Povu Liquiça Ejize PR Taur Interven Lei PV

BAZARTETE – Komunidade Suku Lauhata, Postu Administrativu Bazartete, Munisipiu Liquiça husu ba Presidenti Republika (PR) Taur Matan Ruak, halo intervensaun ba Parlamentu Nasional (PN) atu bele halakon kedas lei Pensaun Vitalisia (LPV).

Lia hirak nee hatoo husi Komunidade Suku Lauhata, Sampaio Bareto, liu husi dialogu aberta ho komunidade suku Lauhata, Postu Administrativu Bazartete, Munisipiu Liquiça, Tersa (04/10/2016).

Ami husu atu Prezidenti halo intervensaun ba lei Pensaun Vitalisia, ami nia hakarak nee tenke halakon tiha laos muda deit, tanba povu sira terus ba rai ida nee sei kontinua kiak, ukun nian sira hariku deit ema grupu balun deit,” hateten Sampaio.

Iha fatin seluk komunidade Suku Maumeta Marcelo Marcos da Silva dehan, PV halo diak deit grupu oan balun, nee hanesan korupsaun legal ida neebe lao iha TL.

Hatan ba preokupasaun nee Prezidenti Republika Taur Matan Ruak dehan, PR mos hanoin hanesan ho komunidade sira, mais PN hanesan orgaun soberaniu agora debate hela, husu para povu hotu hein nia rezultadu.

“Ita nain rua hanoin hanesan mais Parlamentu orgaun soberaniu ida ita hein sira, ita la bele obriga, ita koalia deit sistema maka hanesan nee ona, ita hotu kumpri lei, mais hau dehan politika aat hahalok at obriga sidadaun halo tuir mais atu muda lei aat nee tenke Parlamentu maka muda laos Prezidenti ita husik sira maka deskute ita akompana deit sira mos ema iha hanoin hare ba ema hotu nia preokupasaun sira iha fuan sira bele muda,” dehan PR Taur. Informasaun kompletu iha STL Jornal no STL Web, edisaun Kinta (6/10/2016). Joao Anibal

Suara Timor Lorosae