PR Taur Vizita Suku Iha Ainaro Taka Ona Odamatan

Ainaro - Prezidente Republika (PR) Taur Matan Ruak, tuir nia promesa durante mandatu, tenke vizita hotu suku 442, iha Timor laran tomak, tanba nee husi Munisipiu Ainaro taka ona odamatan ho suku Nunumoge hanesan vizita ikus, depois lansamentu fatuk dahuluk ba konstrusaun Heroi da patria iha suku Maununu.

Laos iha Munisipiu Ainaro deit maka Prezidente vizita remata, maibe antes nee iha suku sira iha Munisipiu Ermera, Covalima, Same, Manatuto, Aileu, Bobonaro ho Oecusse mos remata. Agora sei hela suku sira neebe Prezidente seidauk vizita hotu maka hanesan iha Munisipiu Dili, Baucau, Viqueque, Lautem ho Liquica.

Tanba nee hau mai tuku imi nia odamatan husu imi ita lao hamutuk serbisu makas, hodi buka moris diak, laos nee deit, maibe hau mos mai fo obrigadu ba imi, ba terus no susar ita infrenta iha funu laran, tanba imi maka ami moris, tanba imi maka nasaun moris, imi maka heroi nasaun ida nee nia,” hateten Taur, liu husi dialogu komunitariu, ho povu Suku Nunumoge, Postu Administrativu Hatobuilico, Munisipiu Ainaro.

Xefi Estadu nee mos aumenta tan katak wainhira buka moris diak, povu tenke kuidadu saude, haruka oan sira ba eskola, hadia ekonomia uma laran no serbisu hamutuk ho autoridade lokal sira hodi atinzi objetivu neebe povu TL mehi.

Maske programa nee diak, maibe sei mosu kritika oi-oin husi parte lider politika balun, tanba la konsideira esforsu Prezidente hodi here rasik kondisaun no situasaun ril povu TL, liu-liu iha suku sira, neebe maka la asesu ba dezenvolvimentu.

Maibe wainhira Xefi Estadu ba vizita suku sira, povu barak maka halerik ho matawen hasoru Xefi estadu, tanba TL ukun aan tinan 14, maibe sira seidauk sente benefisiu husi ukun aan ida nee no nunka ukun nain ida atu hakbesik ba sira hodi rona sira nia halereik. Informasaun kompletu iha STL Jornal no STL Web, edisaun Tersa (4/10/2016). Joao Anibal

Suara Timor Lorosae