L-4: LPV KRIA DESIGUALDADE SOSIAL

Eis Komandante Pelutaun Falintil iha tempo resistensia nebe mos atual resposavel organizasaun resistensia Sagrada Familia, Andre da Costa Belo ‘L-4’, konsidera Lei Pensaun Vitalísia (LPV) hamosu diskriminasaun bo’ot ba Veteranus, tanba kria desigualidade sosial iha Timor-Leste (TL).

“LPV ne’e diskriminasaun bo’ot. Agora ema ne’ebé mak halo funu 24 anos, hanesan maun Xanana, Lu-OLo, Taur, Lere, U$ 600.00, ne’e porsentu hira los mós  ita lahatene? agora ami sira ki’ik ne’e mak U$2,70, ida ne’e diskiminasaun bo’ot,”esplika L-4 ba jornalista iha nia kna’ar fatin Universidade Dili (UNDIL), Tersa (04/10).

Nia hatutan, lolos karik pensaun Vitalísia  ne’e  bele tun ba U$ 600.00 ka 1000, la’os sa’e kedas ba ba U$ 1500.

“Ha’u hanoin  ida  ne’e diskriminasaun bo’ot ba Veteranu sira. Veteranu sira halo funu ida iha ailaran toba iha rai, han aitahan deit hanesan ne’e,”dehan L-4.

Nia dehan, lolos ne’e primeiru haree ba Veteranus oras ne’e laiha tiha ona, hela deit feto faluk, entaun oan kiak sira Estadu tenki haree sira nian moris.

“Ita haree ba ferik katuas sira hakdasak, depois haree ba ami ne’ebé mak sei moris. Maibe ne’ebé mak moris buka han ho hemu, kuitadu ami nian maluk veteranus balun toba iha merkadu to’o ohin loron ha’u nia soldadu ida naran Izadoro agora iha merkadu. Ne’e signifika sira halo funu ba ema seluk, mas sira nunka aproveita ukun a’an ida ne’e,”hatete L-4.

Hanoin hikas ba kotuk, foin lalais Parlamentu Nasional iha fulan kotuk halo ona diskusaun ba LPV ne’ebé dehan atu altera LPV.

“Tuir Prezidente  nia hanoin  karik LPV  ne’e tenki hamós tiha, tanba ita sei haree ba ita nian povu ne’ebé mak sei kiak iha area rurais ne’eba. Agora ita kontinua hanesan ne’e tinan rua-tolu riku bele sa’e ba leten, kiak ne’e kiak los ona, ne’e ita labele dehan kiak ne’e atu sa’e ba riku, povu ne’e kontinua hakdasak ba rai,”hatete L-4.avi

Jornal Nacional