PR TAUR: “HA’U MAK SEI DESIDI TAMA CNRT KA FRETILIN”

Prezidenti Repúblika (PR), Taur Matan Ruak, esklarese katak, agora dadauk nia seidauk bele deklara sai kona-ba ninia involvimentu iha partidu polítika ruma, tanba nia sei asume hela kargu hanesan Xefi Estadu Timor Leste (TL) hodi tau matan ba nasaun ho povu iha nasaun ida ne’e.

“20 de Maiu 2017 agora, alin mai fali husu ha’u kona-ba ha’u involve-an iha partidu ka la’e, tanba agora ha’u Prezidenti Repúblika Timor Leste. Aban bainrua eis Prezidenti Repúblika ona mak ha’u mak sei desidi atu ba CNRT ka FRETILIN ka partidu seluk,” deklara Prezidenti Repúblika (PR) Taur Matan Ruak, iha Programa Diálogu Komunitária Prezidenti Repúblika ho komunidade iha Suku Doidahar ho Suku Dato, Postu Administrativu Liquiça, Munisípiu Liquiça, Segunda (03/10).

Maibé Xefi Estadu ne’e dehan, iha 20 de Maiu tinan oin, nia sei deklara sai ba públiku katak, nia atu involve-an iha partidu ida ne’ebé mak nia hakarak.

Kona-ba Pensaun Vitalisia, PR Taur dehan, desdi nia sei iha Jeneral F-FDTL mós, nia  kontra maka’as lei ida ne’e.

“Foin dada’uk ha’u nia diskursu iha Parlamentu Nasionál mós, ha’u ko’alia kona-ba ida ne’e,” katak Taur Matan Ruak.

Xefi Estadu ne’e haktuir, hanesan Xefi Estadu, nia sei ko’alia nafatin, kona-ba ida ne’e, maibé tenki respeita mós Parlamentu Nasionál, tanba sira mós órgaun Estadu ida.

Xefi Estadu ne’e relata lia hirak ne’e hodi responde kona-ba preokupasaun komunidade Laurindo de Jesusu dos Santos ne’ebé hatete katak, tuir informasaun ne’ebé sira rona katak, PR Taur involve aan ona iha partidu ruma.

“Ami rona katak, agora dada’uk Prezidenti Repúblika partisipa ona iha Partidu ruma, ida ne’e los kala’e,” husu Laurindo de Jesus dos Santos.

Alende ne’e, nia mós kestiona katak, durante ne’e ema hotu luta kona-ba pensaun vitalisia ne’e atu halakon tiha. Hahú husi Prezidenti Repúblika  nia kompaña to’o ohin loron mandatu atu remata ona, nia solusaun oinsa ona,” husu Laurindo.

Nia hatutan, sei Prezidenti Repúblika nia mandatu hotu mak situasaun ida ne’e la rezolve, semak atu rezolve tan.

Mandatu remata, TMR apoia PLP

Entretantu Prezidenti Interinu II, Partidu Libertasaun Povu (PLP), nu’udar mós eis Komandante Pelutaun Falintil, Andre da Costa Belo ‘L-4’ deklara, bainhira mandatu Prezidenti Repúplika Taur Matan Ruak (TMR) remata iha  21 Maiu 2017, TMR sei fila ba apoia PLP.

“Aban bairua nia kna’ar  ne’e hotu iha 2017, nia  sidadaun ida, nia mós bele hili PLP. Tanba  ami  esperansa katak, nia fo hanoin querdizer  nia mós hakarak. Ne’e mak ami nu’udar lideransa partidu nian kontinua garante katak, depois nia mandatu ne’e hotu, nia mós bele fó apoiu ba PLP. Ida ne’e mak agora ami koalia, maibe la koalia  n’uudar Prezidente,    Prezidente ne’e ba nasaun nian,  ne’ebé ita labele koalia no  labele estraga mós nia figura, ”esplika L-4 ba jornalista iha nia kna’ar fatin Universidade Dili (UNDIL), Tersa (04/10).

 L-4 kontinua dehan, bainhira Prezidente Repúplika, Taur Matan Ruak mak nia mandatu remata, no nia mai inklina a’an iha PLP, nia pozisaun hanesan kedas Prezidente PLP.

“Ami bele tau nafatin nia nu’udar Prezidente Partidu nian, hanesan mós maun  Xanana.  Maun Xanana mós uluk fó hanoin ba CNRT, ikus mai nia nu’udar Prezidente CNRT to’o agora. Ami sei esperansa katak, depois nia mandatu hotu mak ami foin bele desidi, agora  ne’e ami hanesan komentariu deit, ami seidauk hatene nia sai hanesan Prezidente. Agora dadauk  ne’e Prezidente  Interinu mak Dotor Aderito de Jesus, uluk komisariu CAC, nune’e mós  Prezidente 1 mak Sabino  Guntur,  Vise mak ha’u L-4,”dehan Andre  da Costa ‘L4’.

Fo hanoin  hikas  katak,  PLP hahú  rejista iha dia 19  Dezembru 2015, ne’ebé mak partidu ne’e sai legal ona hanesan mós partidu sira seluk iha Timor Leste.

“Ne’ebé ami dala ruma hatete katak,  hanesan  maun Taur Matan Ruak,  ami la koalia aktual Prezidente  nein  koalia kona-ba Prezidente, ami koalia ba maun Taur Matan Ruak, mós nia uluk ne’e fo apoiu  duni  ba PLP  nomós  nia apoiu mós ba partidu sira seluk,”dehan L-4.

Nia realsa katak, uluk harii PLP mós la koalia kona-ba Prezidente nian pozisaun,  maibe kleur lais publiku sei hatene. Tanba nu’udar sidadaun bele harii partidu.

“Maun Taur ami koalia duni kona-ba PLP, no nia mós fo hanoin duni ba ami. Ami mós ba konsulta duni oinsá mak ami bele harii PLP, ne’ebé fo apoiu ba ami  katak, imi bele harii nu’udar sidadaun.  Ita nian nasaun  ne’ebé demokratiku, imi mós  iha direitu harii partidu.   Ne’ebé fo korajen ami harii duni partidu. Nu’udar maun  ne’ebé uluk iha rezistensia no mós ami hatete bai-bain ami sira ne’e koñese malu, tanba  uluk moris hamutuk iha ailaran,”tenik L-4.cos/avi

Jornal Nacional