Adota Merkadu Livre Maibé Tenke Kria Lei Ne’ebé Justu

DILI, (ANTIL) - Guido da Costa, Prezidente Ezekutivu Asosiasaun Fakuldade Ekonomia no Jestaun (FEJ), Universidade Nasionál Timor Lorosa’e (UNTL)  hatete, nu’udar estudante  ne’ebé haree ba sistema merkadu livre daudaun ne’e Timor-Leste adota, tuir loloos Governu tenke kria lei ida ne’ebé justu para bele halo kontrolu iha merkadu.

Realidade haree ba komunidade sira ne’ebé halo negósiu ki’ik ho Xineza sira ne’ebé mai halo investimentu, komparasaun entre rua ne’e Xina ho nia investimentu ne’ebé boot enkuantu negosiante sira ho investimentu ki’ik nune’e oinsá mak bele hamosu kompetisaun ida ne’ebé kompetitivu.

“One dollar shop ne’ebé kuaze espalla iha Dili laran ne’ebé ita-nia komunidade barak mak asesu hotu ba iha loja ne’e, hanesan ema akadémiku haree ida ne’e ita-nia sentimentu nu’udar ema ekonomista ladún satisfás tanba haree ba iha sasán ne’ebé fa’an ne’e, ita bele kategoria iha ema nia rai karik lixu tiha ona mak sira mai fa’an iha ne’e”, Guido dehan.

Guido kontinua, loja dolar ida ho folin baratu bele fó impaktu ba empreza ki’ik sira ne’ebé agora halo negósiu tanba sasán ne’ebé sira fa’an hanesan mós sasán Xina fa’an maibé ho folin ne’ebé lahanesan.

“Governu tenke tau prioridade atu nune’e bele rezolve lalais tanba sei sira mak larezolve sei fó impaktu empreza ki’ik sira ne’ebé foin halo investimentu iha sira-nia negósiu no sei mate, ikus mai mosu iha ita-nia nasaun ne’e domina husi ema estranjeiru tanba Governu seidauk tau lei ida ne’ebé justu ba kotrola merkadu”, nia hatete.

Nu’udar jerasaun foun hanesan ekonomista, Guido hatutan kestaun ne’e mak larezolve sai mós kestaun ida ba estudante universitáriu hotu tanba povu nia liman-ain, tilun no matan mak estudante universitáriu atu rezolve ida ne’e.

Adão dos Santos Martins, estudante husi FEJ mós akresenta loja dolar ida bele hamonu empreza sira seluk, ne’ebé fa’an sasán ho kualidade. “Loja dolar ida fa’an sasán ladún kualidade ho durasaun ne’ebé lanaruk”.

“Sira mós kópia produtu lokál hanesan tais no halo ba produtu sira-nian, depois fa’an fali iha loja one dolar ne’ebá. Hanesan estudante ladún satisfás ho sira-nia vida negósiu”, Adão relata.

Maski Timor-Leste adota merkadu livre maibé lei mak tenke forte atu toma kontrola ba atividade merkadu.

Enterantu, Ministru Koordenadór Asuntu Ekonómiku (MEKAE) no Ministru Agrikultura no Peska (MAP),  Estanislau da Silva, Segunda (7/11/2016)  iha Palásiu Governu hatete, Timor-Leste iha ona lei protesaun ba konsumidór maibé sei implementa iha tinan oin tanba presiza tan Dekretu Lei balun.

“Bainhira implementa ona,  Governu tenke estabelese instituisaun adekuadu atu kontrola konsumidór sira. Nune’e, sasán sira ne’ebé laiha kualidade, labele fa’an iha loja sira. Kuandu buat ruma laiha kualidade, populasaun iha direitu atu  fó filafali ba loja, tanba buat hotu iha protesaun.”,  MEKAE informa. (Jornalista : Maria Auxiliadora)