Profesores Kontinua Uza Violensia Hanorin Estudantes

Professores kontinua uza violensia (baku, ku’u, basa no violensia seluk tan) hodi hanorin estudante sira iha eskola, maske iha ona zero toleransia ba profesores ne’ebe halo violensia kontra labarik sira iha eskola.

Membru Parlamentu (MP), Anastasia Amaral lamentavel ho aktu violentu ne’ebe profesores sira halo hasoru estudantes durante prosesu aprendizajen iha aula, tanba hahalok ne’e hatauk labarik sira. 

“Ita dehan zero toleransia, maibe profesores kontinua baku estudante sira e governu liu –liu ministerio relevante la halo asaun ba asuntu ida ne’e,” nia kestiona, iha plenaria Parlamentu Nasional. 

“Bele baku alunus maibe ho maneira ida hanorin, la’os baku atu oho, ne’e krime, tenke prosesu tuir lei.” 

Nia dehan, iha semana rua liu ba iha eskola Sekundariu Publiku Kalisa, munisipiu Viqueque, professor baku estudante feto ida to’o desmaia tiha iha aula laran, tan deit viola regras eskola nian.

Enkuantu estudante ne’ebe hetan baku ne’e, nia dehan familia evakua mai iha Dili tiha ona hodi halo tratamentu no hasai ray-x. 

Nia hateten, ida ne’e akontese beibeik ona e professores sira baku alunus sira to’o monu iha fatin. 

Tanba ne’e nia husu Ministerio Edukasaun (ME) atu toma medidas ba professores ne’ebe ho atitude violentu tanba sira lamerese sai edukador. 

Iha tinan 2009, IV governu konstitusional hasai ona despaisu ida kona ba politika zero toleransia ba profesores ne’ebe halo violensia hasoru estudantes, ho objetivu atu evita professores labele eduka alunus ho violensia fiziku. 

Entretantu informasaun kona ba baku estudante ne’e hetan rejeita husi Diretor Edukasaun munisipio Viqueque, Amilio Amaral, katak informasaun ne’e la los.

“Ne’e la los, estudante ne’e monu la’os tanba professor baku, maibe nia kerasukan deit,” nia hateten. 

Tanba ne’e, nia husu MP atu hatudu faktus bainhira levanta kazu violensia hasoru estudantes iha eskola. 

Entretantu estudante Aileu Odelia da Luz Vargas, hateten violensia hasoru labarik feto iha eskola, uma inklui iha komunidade nia le’et kontinua akontese, tanba sosializasaun politika zero toleransaia ba profesores seidauk maximu. 

“Labarik feto sira seidauk brani atu hateten la’e ba violensia ne’ebe sira infrenta, tanba sira tauk,” nia hateten. 

Alende ne’e, nia mos preokupa ho distansia uma ba eskola ne’ebe do’ok tanba fo ameasas bo’ot ba iha labarik feto sira atu hetan abuzu seksual no asaltu seksual iha dalan.

The Dili Weekly