Produsaun Rai Laran Menus, Susar Atu Hapara Importasaun Fos

DILI – Timor Leste susar hapara importasaun fos husi rai liur, tanba hare ba produsaun rai laran menus, maske tinan barak ona governu aloka traktor no hand traktor ba povu Agrikultuta, maibe realidade seidauk hatudu iha baze.

Kestaun nee fo sai husi Ministru estadu Koordenador asuntu Ekonomia, e Ministru Agrikultura e Peska, Estanislau da Silva liu husi debate OJE 2017 iha Parlamentu Nasional (PN) Sesta (25/11/2016).

Hare ba ita nia produsaun iha rei laran kada tinan kontinua tun tanba nee, susar tebes ba ita atu hapara importasaun fos husi rai liur, no atu halo kompara ho Nasaun sira neebe dezenvolvimentu avansadu hanesan Indonesia mos, too agora sei depende importasaun fos husi Nasaun balun, no iha Timor hare neebe ita produs nee bele haan too fulan tolu hat nia laran,” dehan Ministru Estanislau.

Nia mos informa liu tan katak, atu aumenta produsaun iha rai laran, maka tenke liu husi investigasaun, oinsa halo avaridade ba produsaun iha rai laran, atu nunee labele produs fos deit, maibe oinsa atu hare ba buat seluk oinsa bele diversifika aihan alimentar sira seluk iha rai laran, hanesan Koto no batar.

Iha fatin hanesan Deputada Jacinta Pereira mos hatutan, tinan-tinan PN aprova osan boot ba iha Ministeriu Agrikultura, oinsa atu eduka povu Agrikultor sira halo natar, maibe realidade neebe akontese katak produsaun rai laran menus no fos importasaun maka domina iha merkadu. Informasaun kompletu iha STL Jornal no STL Web, edisaun Sabado (26/11/2016). Madalena Horta

Suara Timor Lorosae