Investimentu Siénsia no Teknolojia iha Ensinu Superiór Asume Fatór Xave

DÍLI, (ANTIL) — Ministru Estadu Koordenadór Asuntu Sosiál no Ministru Edukasaun, António da Conceição afirma perante graduadu pós-graduasaun, estrutura UNTL, korpu diplomátiku no ilustre konvidadu sira iha Sentru Konvensaun Díli, Kinta (24/11) katak graduasaun estudante iha área estratéjika sira ba dezenvolvimentu nasionál, nu’udar motivu alegria no esperansa ba futuru nasaun nian.

“Formasaun rekursu umanu liuhusi investimentu siénsia no teknolojia iha ensinu superiór, asume fatór xave ba jestaun sustentável ba ita-nia rekursu naturál no ba konkretizaun modelu dezenvolvimentu umanu no sustentável ba ita-nia nasaun,” hatete Ministru Edukasaun, António da Conceição iha nia intervensaun.

Ho razaun ida ne’e, iha Planu Estratéjiku Dezenvolvimentu Nasionál (PEDN) 2011-2030, sistema edukasaun ensinu bele forma rekursu umanu ne’ebé kualifikadu ne’ebé Timor-Leste presiza hodi kontinua konstrusaun ita-nia nasaun. Pontu ida ne’e, importante mak reforsa siénsia no formasaun akadémika iha kuadru nasionál ih setór estratéjiku dezenvolvimentu, agrikultura, peska, turizmu no enjenária.

Ministru Edukasaun, António da Conceição akresenta, UNTL enkuantu nu’udar instituisaun publika ensinu superiór universitáriu, nu’udar mós modelu ba ensinu superiór sira seluk iha Timor-Leste.“Referénsia ida iha nível kumprimentu ba orientasaun polítika ensinu superiór nian, referénsia ida iha nível rigor ensinu no bele mós referénsia ba nível jestaun no organizaun institusionál,” nia hatutan.

Estatutu UNTL ne’e klaru, afirma pilár fundamentál tolu katak forma no gradua estudante ho nível intelektuál ne’ebé aas, halo peskiza ho maneira sientífika, halibur estudante sira ho valór umanu hodi aprofunda konsiénsia nasionál ba sentidu servisu ne’ebé afavór ba moris di’ak no prosperiedade sidadaun sira hotu nian.

Promove komprensaun, armonia no solidaridade entre kultura no povu. Iha kontestu ida ne’e mak UNTL kontinua fó misaun importante, halo formasaun kuadru nasionál hodi sai elementu potente ba aprendizajen durante moris.“Respeita valór orijinál sira akademia nian, valór eselénsia, rigor no méritu nian hodi buka matenek no koñesimentu,” salienta Ministru Edukasaun, António da Conceição.

UNTL bele kontinua mós diferénsia-an, la’ós de’it buka eselénsia iha nível sientífiku maibé mós nível formasaun karaktér estudante.Iha formasaun karakter estudante idaidak nian bele impresu valór responsabilidade nian, demokrasia, toleránsia, direitu umanu no naturalmente respeitu ba ita-nia istória, ba ita-nia eroi nasionál sira. Aspetu seluk mak utilizasaun língua ofisiál (tetun no portugés) nu’udar língua instrusaun no asesu koñesimentu.

Atu konklui, Ministru Estadu Koordenadór Asuntu Sosiál no Ministru Edukasaun, António da Conceição husu ba pós-graduadu UNTL sira hodi kontinua serbisu ho laran luak no responsabilidade.

“Ita-boot sira serbisu ho laran luak no responsável, aplika koñesimentu sira ne’ebé ita-boot sira hetan durante ita-boot sira-nia estudu ba dezenvolvimentu ita-boot sira serbisu profisionál no konsekuente ba dezenvolvimentu ita-nia nasaun,” nia hameno.

Tanba ne’e, Ministru Edukasun António da Conceição insentiva no dezafia graduadu sira, hodi sai ezemplu iha komunidade nia leet.“Ha’u husik dezafiu iha ne’e, hodi imi lidera iha komunidade nia leet, nu’udar ezemplu alende responsabilidade ligada ho grau akadémiku, fó valór, komportamentu no liuhusi karakter. Karakter ne’ebé marka ita-nia luta ba libertasaun hodi marka mai ita ohin loron ita-nia identidade nasionál,” nia dezafia.

Ministru Edukasaun ne’e, hateten hodi sita saudozu prezidente Amérika, John Kennedy katak ho laran luak refleta, antes husu ba nasaun saida mak nia sei halo ba ita, maibé husu saida mak ita halo ba nasaun.

“Kontributu kada sidadaun ba dezenvolvimentu nasionál sukat liuhusi imi nia kapasidade hodi serbi nasaun ho responsável no patritika. Ita-nia universidade públika nu’udar lalenok ba ita-nia nasaun no asume eskola rigor ezijensia no liberdade ba pensamentu no dialogu,” nia hakotu.

Pós-graduadu UNTL ne’ebé gradua ona ne’e kompostu husi kursu enfermajen no Parteira, akuntabilidade nomós polítika no jestaun edukasionál. (Jornalista:Rafy Belo/Editor: Otelio Ote)

Foto: Ministru Estadu Koordenadór Asuntu Sosiál no Ministru Edukasaun, António da Conceição durante nia intervensaun iha serimónia graduasaun ba Pós-graduadu UNTL da-XVI iha Sentru Konvensaun Díli, Kinta (24/11). Foto ANTIL, Egas Cristovão.