Kronolojia Julgamentu Arguida Emilia-Madalena

Tribunal Distrital Dili seidauk bele foti desizaun ba kazu ne'ebe Eis Ministra Finansas Emilia Pires no Eis Vise Ministra Saude Madalena Hanjam komete.

DILI: Prosesu julgamentu ba kazu eis Ministra Finansas Emilia Pires no eis Vise Ministra Saúde Madalena Hamjam hanesan ‘laiha rohan’. Tribunal Distrital Dili (TDD) kontinua adia julgamentu ba arguida na’in rua ne’e.

Tuir dadus ne’ebé olatimornews.com iha, desizaun TDD hodi adia julgamentu ba kazu sosa kama Hospital Nasionál Guido Valadares, husi Sesta (25/11) ba Kuarta (30/11), nudar desizaun ba dala neen.

Tuir mai kronolojia prosesu julgamentu ba kazu arguida Emilia no arguida Madalena.

- 20 Setembru 2016, Ministériu Públiku (MP) akuza pena prizaun tinan 10 no multa ba arguida Emilia Pires no Madalena Hanjam.

- 22 Setembru, eis Vise Ministra Saúde Madalena Hanjam hato’o ninia deklarasaun ba Tribunal.

- Iha fulan Setembru nia laran, TDD fó lisensa ba arguida Emilia ne’ebé reprezenta TL hodi ba partisipa iha enkontru G7+ iha Nova Iorke.

- Tuir pedidu, arguida Emilia sei fila mai iha loron 19 Outubru no entrega nia pasaporte ba TDD iha loron 20 Outubru.

- Tuir ajenda, iha 21 Outubru, arguida Emilia sei hato’o ninia deklarasaun iha Tribunal relasiona ho kazu ne’ebé nia komete.

- TDD adia fila fali julgamentu ba loron 24 Outubru tanba Juiza Francisca Cabral husu lisensa ba partus.

- 24 Outubru, tanba arguida Emilia la marka prezensa, TDD deside hodi fó tan loron lima (5) ba arguida, nune’e julgamentu adia ba loron 31 Outubru.

- Advogadu Privadu arguida Emilia, José Camoes, iha 24 Outubru informa katak, ninia kliente halo hela tratamentu saúde iha Australia.

- 29 Outubru, liu husi rede sosial facebook, advogadu arguida Emilia informa ba públiku katak ninia kliente sei la mai Timor-Leste to’o nia saúde rekopera.

- 30 Outubru, Advogadu José Camoes informa katak ninia kliente, arguida Emilia, sei hala’o operasaun ba nia ain iha 5 Novembru 2016, iha Australia.

- 31 Outubru, prosesu julgamentu kontinua la la’o, no TDD deside hodi adia fali ba loron 4 Novembru.

- 4 Novembru, Juis Prosesu José Maria de Araujo deklara katak arguida Emilia komete tan krime foun, krime dezobediénsia, tuir kodigu penal artigu 244.

- TDD promete sei foti desizaun iha 16 Novembru kona-ba saida mak presiza halo bainhira arguida Emilia la fila ona mai Timor-Leste hodi tuir prosesu julgamentu.

- 16 Novembru, TDD la konsege foti desizaun ba arguida Emilia Pires no adia ba 25 Novembru, tanba Juiza Francisca moras.

- 25 Novembru, TDD adia tan julgamentu ba kazu arguida Emilia no Madalena ba 30 Novembru ho razaun Juiza Francisca hala’o hela tratamentu saúde iha HNGV.

Hein katak iha 30 Novembru 2016, TDD sei konsege foti duni desizaun rum aba kazu ne’ebé eis lideransa governu na’in rua ne’e komete. (*)

Tribunal Distrital Dili seidauk bele foti desizaun ba kazu ne'ebe Eis Ministra Finansas Emilia Pires no Eis Vise Ministra Saude Madalena Hanjam komete.

Ola Timor -  Editór: Tellukoro

Lee liu iha Ola Timor

PR Taur La Fiar Arguida Emilia Halai

PJR: Lalika Preokupa ho Deklarasaun Na’ok-ten