Allan: Jornalizmu Sem Ativizmu Sei La Susesu

DILI, (ANTIL) – Jornalista Investigativu Amerikanu, Allan Nairn perante audiénsia sira hanesan estudante no estrutura Universidade Nasionál Timor Lorosa’e (UNTL) hatete, jornalizmu sem ativizmu sei la-susesu.

“Ha’u supreza haree espíritu joven Timor-Leste iha loron ne’ebá (12/11/1991), iha igreja Motael, iha semitériu Santa Kruz, forsa Indonézia sira mai, povu Timor-Leste la-ta’uk, sira haree tentara (forsa armada) atus ho kilat maibé sira la-nonok, lakohi hakiduk”, Allan hatutan iha Fakuldade Siénsia Sosiál, Kaikoli, Tersa (15/11).

Kestaun ne’e nia aprezenta hodi haktuir kona-ba prosesu bainhira hahú mai Timor-Leste no halo atividade jornalizmu iha 1990 to’o lori sai kazu TL ba mundu internasionál liuhosi semináriu kona-ba “USA Foreign Policy Toward Indonesian Perspective of Human Rights Violence From 1992-1998”.

Nia hatutan, joven sira foti sira-nia lona (spanduk) hodi hakilar katak sira hakarak indepedénsia no forsa Indonézia iha resposta no resposta ne’e mak tiru hasoru manifestante sira.

Forsa sira hetan orientasaun husi sira nia patraun atu oho hotu timoroan sira. “Loos duni sira susesu oho ema barak maibé sira falla oho espiritu joven no povu timoroan nian,”nia salienta tan hodi haktuir kona-ba nia sasin.

Hafoin akontesimentu 12 Novembru 1991, nia parte bainhira iha Estadus Unidus Amérika (EUA), kria grupu ida hanaran ETAN (East Timor Action Network) no agora hanaran East Timor and Indonesian Action Network hodi povu Amérika atu halo presaun ba kongresu Amérika hodi husu apoia EUA atu ku’a subsidiu ba militár Indonézia.

Rezultadu husi asaun ne’e mak, EUA liuhusi prezidente Bill Clinton hapara apoiu ba Indonézia, nune’e Indonézia sira hahú retira militár iha Timor no Prezidente Indonézia altura ne’ebá, Bj. Habibie fó opsaun ba Timor-Leste katak hili referendum no seluk mak kontinua ho Indonézia katak otonomia ka integrasaun.

Allan Nairn reforsa, presiza justisa ba autór sira ne’ebé komete kríme grave, masakre sira ne’ebé akontese iha Timor durante okupasaun Indonézia.

Iha fatin hanesan, jornalista Max Stahl hatete, bainhira ko’alia kona-ba seguransa, la’os iha liman maibé iha kakutak, tan bainhira ema ida bele ameasa ema, bele halo ta’uk ema, maibé bainhira la paraliza ema nia kakutak sei la manan.

Valór ne’ebé povu fahe, grupu barak fahe, sentimentu responsabilidade ba valór báziku Timor nian. “Mai husi avó sira, beiala sira, vizaun revolusionáriu ambisaun demokrátiku bainhira ema prontu fó sira nia-án, integra-án iha kilat. Kilat labele manan,” Max Sthall afirma.

Haree ba prosesu luta ne’ebé akontese iha mundu ohin loron, labele depende ba lider sira, governu maibé tenke bazeia ba relasaun povu nian.

“Prosesu demokratizasaun iha Timor liga ba prosesu demokratizasaun iha Indonézia. Ita mós iha responsabilidade atu informa iha prosesu ida ne’e. La’ós atu koko manipula buat ruma maibé atu koko debate dialógu informasaun,” sujere. (jornalista: Rafy Belo; editora: Rita Almeida)

Foto: Jornalista Investigativu Amerikanu, Allan Nairn.