Partidu Boot Neebe Ukun Laiha Vontade Lori Koruptor Ba Tribunal

DILI – Partidu politiku sira neebe mak oras nee ukun liu-liu partidu boot sira laiha vontade atu lori koruptor sira ba tribunal, ezemplu kazu Emilia Pires neebe mak tribunal bolu maibe sei lao ba mai iha estranjeiru.

Informasaun nee fo sai husi Observador Politika-UNTL, Camilio Ximenes Almeida ba STL liu husi via Telefonika, Kuarta (16/11/2016).

Ita laiha dadus konkreta atu kondena katak proteze hela ema sira neebe mak halo aktu korupsaun, maibe ita bele konsidera katak partidu boot sira neebe mak ukun klaru laiha vontade atu lori ema sira neebe mak korupsaun nee ba iha tribunal,” dehan Camilio.

Camilio haktuir, pior liu tan nia prosesu sira, neebe iha, sira lakoi atu lori ou hasai ninia imunidade ba a iha tribunal, nee hatudu katak sira neebe mak MP kondena nee tauk tiha ona katak sira nee sala, maibe sala ka los tribunal mak deside.

Iha sorin seluk, Sosiedade Sivil AJAR, Inocencio Xavier dehan, haree ba sira (parpol) ninia asaun konkreta ema bele halo presupostu ida asumsi katak, defaktu partidu balun asegura duni ninia membru ruma neebe mak tur iha pozisaun politiku.

Nia dehan, akuntabilidade nee tenke halo partidu iha dever moral fo atensaun ba ninia membru sira katak servisu tuir vizaun ka filozofia partidu nian no mos buat importante liu mak konstituisaun republika no lei sira neebe mak konsagradu. Informasaun kompletu iha STL Jornal no STL Web, edisaun Kinta (17/11/2016). Raimundo S. Fraga

Suara Timor Lorosae