EMILIA PIRES HALO KRIME, LA’OS DEFEZA MAK RESPONSABILIZA

Juiz Administrador Tribunal Distrital Dili (TDD), Duarte Tilman, informa, kazu eis Ministra Finansas arguida Emilia Pires mak halo krime, nia mak responsabiliza, la’os defeza husi ninian mak responsabiliza fali.

“Hanesan kazu arguida Emilia Pires nian, nia maka halo krime, nia mak responsabiliza la’os fali nia defeza mak responsabiliza fali,”Juiz Administrador TDD, Duarte Tilman hato’o lia hirak ne’e ba jornalista iha Caicoli, Dili, Segunda (21/11), relasiona ho deklarasaun husi Deputadu Parlamentu  Nasional sira nian kona-ba kazu arguida Emilia Pires nian ne’e defeza mak responsabiliza, kuandu nia halai ba rai liur.

Tuir Duarte Tilman, iha lei nia oin, oan mak halo sala, oan mak ba hatan. La’os aman mak ba hatan fali oan nia sala.

“Karik arguidu Emilia halo tun-sae atu hodi hases an husi justisa, ida ne’e iha hal hal yang memberatkan ka meringankan. Nia halo krime, nia mak responsabiliza,” hatete Juiz Administrador Duarte Tilman.

Duarte Tilman afirma tan, halai fali ba kazu sivil oin seluk. “Wainhira aman deve osan oan nian bele selu ka kolega ida deve ema nia osan kolega seluk bele selu fali. Maibe krime kuandu aman naok ema nia osan,  aman tenki responsabiliza, inan mak halo korupsaun inan mak responsabiliza, la’os fali oan ka ema seluk mak responsabiliza fali,”dehan Duarte Tilman.

“Kondenasaun sivil, amigu bele selu fodik ema seluk bele responsabel.  Maibe kuandu responsabilidade kriminal ida-idak ninian. Haree iha ita- nia konstituisaun no ita-nia kodigu penal hatete ida ne’e. Responsabilidade kriminal ne’e la transfere ba ema seluk, la muda ba ema seluk, ida-idak responde nia an rasik,”dehan nia.Des

Jornal Nacional