ESTADU GASTA ONA U$ 8 BILHOENS BA DEZENVOLVIMENTU

Kordenador administrasaun fundu petroliferu Ministeriu Finansas, Felipe Nery Bernado hatete, durante nee governu hasai ona osan husi fundu petroliferu nian hamutuk U$ 8 bilhoens ba dezenvolvimentu rai laran.

“Agora kona ba nia rezultadu dezenvolvimentu ne’e husi sosiadade sivil ho media inklui publiku mak bele hatene lao oinsa, maibe nia objetivu husi osan ne’e mak atu dezenvolve nasaun duni,’’ dehan Felipe iha nia diskusaun ho Banku Central Timor Leste (BCTL) bainhira lansa relatorio fundu petroliferu ba segundu trimester iha edfisiu BCTL, Sesta (4/11).

Felipe hatete, osan sira ne’e mak ba hadia estrada, hadia eskola, centru saude no programa sira seluk ne’ebe ba dezenvolvimentu povu nian inklui nasaun ne’e nian.

‘’ Ita kestiona kuando estrada ida ohin halo aban at ona, eskola ida ohin halo  aban rahun ona, ida ne’e tanba gasta oan deit la iha rezultadu,’’ tenik Felipe.

Iha fatin hanesan Charles Schener hanesan peskijador Lao Hamutuk hatete, los duni katak, osan sira ne’e atu halo dezenvolvimentu hadia povu nia moris hanesan hadia dalan ba sira, asesu eletricidade, asesu edukasaun sentru saude no be mos.

‘’ Ita haree iha fatin barak buat sira ne’e povu seidauk asesu hanesan saniamentu,  sentru saude, eletricidade, eskola no sira seluk agora Governu gasta ona osan  husi fundu petroliferu U$ 8 bilhoens, ita haree osan balun ba mega projetu ne’ebe la fo benifisiu ba povu hansan uma andar bot ba Ministeriu Finansas ne’ebe agora la uja, deputado ho membru  Governu inklui  funsionario sira halo viajen barak ba rai liur,  osan pensaun vitalia ne’ebe ema barak kestiona, projetu tasi mane hau hanoin lider iha Timor Leste liu-liu deputado sira ne’ebe agora deskute hela Orsamentu Jeral do Estadu (OJE) tenki haree despejas iha futuru ho kuidadu tenki sukat saida mak sei fo benifisiu I saida mak ita gasta arbiru,’’ esplika Charles.

Charles subliña, osan U$ 8 bilhoens husi fundu petroliferu gasta hotu ona, karik iha futuru mak  reseitas mina tun ba bebeik agora nasaun Timor Leste atu halai ba ne’ebe.

Nia dehan tan, agora Timor Leste rasik nia ekonomia noun petroliferu seidauk iha entaun iha futuru mina ne’e maran nasaun Timor atu foti osan husi nebe  hodi halo desenvolvimentu. nia

Jornal Nacional