BULETIN VOTUS SEGUNDA VOLTA DISTRIBUI IHA 10 NOVEMBRU

Diretor Jeral Sekretariadu Tékniku Administrasaun Eleitoral (STAE), Acilino Manuel Branco informa katak, buletin votus ba eleisaun Xefi Suku segunda volta nian, STAE sei distribui ba munisípius no aldeia sira iha loron 10 Novembru.

“Oras ne’e dau-dauk ita apoiu hela para emprimi bulletin votus, oras ne’e dau-dauk emprimisaun la’o dau-dauk hela no tuir planu iha dia 10 Novembru sei transporta bulletin votus sira ne’e ba iha munisípiu, para nune’e iha dia 11 ou 12 Novembru distribui ba iha aldeia para nune’e bele uza iha dia 13 Novembru,” Diretor Jeral STAE ba JN-Diário iha ninia knaar fatin Caicoli-Díli, Segunda (07/11/2016).

Nia esplika katak, material ne’ebé maka STAE sei apoiu tan maka termus de lojistika ninian, ida fali ho material eskritóriu sira porezemplu hanesan ita tenki forñese lapijeira, spidol no selu-selu tan para lori halo kontajen votus ninian.

“Material sira seluk ne’e hanesan urnas ne’e ita la fó ona apoiu, tanba iha nanis ona munisípiu no aldeia, ne’ebé oras ne’e dau-dauk iha munisípiu sira mós reorganiza fila-fali material sira ne’e hein de’it atu utiliza fila-fali iha dia 13 Novembru,” dehan Acilino Manuel Branco.

Nia akresenta katak, konabá eleisaun suku ne’e lei hateten orgaun eleitoral fó apoiu lojistika, formasaun no sosializasaun de’it, tanba parte ne’ebé organiza maka Ministeriu Administrasaun Estatal (MAE), Administrasaun Munisípiu no konsellu suku sira maka organiza prosesu tomak hanesan prezidi kandidatura, simu kandidatura, prosesu votasaun, kontajen no apuramentu.

“Ha’u hanoin iha deputadu balun fó sala ba STAE no CNE konabá failla sira iha eleisaun suku, loloos ne’e sira tenki konsulta uluk saida maka hakerek iha lei eleisaun suku ninian ne’e maka bele fó esteitmentu, tanba iha lei ne’e órgaun eleitoral só fó apoiu de’it parte tékniku ninian,” reforsa Acilino Manuel Branco. Nia relata katak, agora dau-daun STAE nia preparasaun maka oinsa atu emprimi fila-fali bulletin votus ba kandidatu sira ne’ebé avansa ba segunda volta ninian, tanba iha dadus ne’ebé maka simu husi munisípiu sira ne’e hamutuk 301 sukus maka sei avansa ba segunda volta.ves

Jornal Nacional