OMC debate iha Dezembru adezaun Timor-Leste nian hanesan membru observador - ministru

Organizasaun Mundial Komérsiu nian (OMC) prepara hela prosesu hodi permiti debate, iha fulan-Dezembru, ba adezaun Timor-Leste nian hanesan membru observador hosi organizasaun, hatete hosi ministru timoroan ba Lusa.

Estanislau da Silva, ministru Estadu, Kordenador ba Asuntu Ekonómiku sira no ministru Agrkultura no Peska nian, hatete ona ba Lusa katak delegasaun ida hosi OMC vizita hela Timor-Leste iha loron hirak ne'e hodi prepara dokumentu ida kona-ba prosesu ne'e.

Dokumentu ne'e sei permiti ba sekretariadu OMC nian hodi "aprezenta iha reuniaun formal loron 07 no 08 Dezembru OMC nian proposta ba adezaun Timor-Leste nian hanesan membru observador" hosi organizasaun nian.

Adezaun hanesan membru observador sira akontese antes prosesu kompleksu adezaun nian hodi sai membru loloos OMC nian, ne'ebé hahú ho pedidu formal ida no inklui memorandu ida kona-ba rejimi komérsiu esternu no akordu sira kona-ba kondisaun sira adezaun nian.

Timor-Leste hatudu tiha ona iha tinan 2014 intensaun dahuluk hodi halo parte iha OMC maibé asuntu ne'e "hanesan la la'o", nune'e Estanislau da Silva hahú fali prosesu ho kontaktu foun ho diretor-jeral organizasaun nian ne'ebé haruka ona ba Díli kestionáriu dahuluk sira.

"Ami serbisu mós iha dokumentu ida ne'ebé sei fó posibilidade ba desizaun ida lalais kona-ba adezaun Timor-Leste nian", nia esplika no konsidera katak OMC "la antesipa objesaun maka'as tanba Timor-Leste adopta nafatin liberalizasaun ekonomia nian".

Governante timoroan hatete katak iha "apoiu maka'as" ba adezaun timoroan nian no Singapura "oferese ona apoiu diretu", hodi argumenta katak "ne'e sei halo lalais tebes adezaun ba ASEAN".

Estanislau da Silva hatete katak adezaun hanesan pozitivu ba Timor-Leste hodi "hetan asesu ida reguladu liu ba merkadu internasional ho protesaun sira ne'ebé iha" hodi permiti ba nasaun hetan benefísiu sira hosi protesaun internasional sira ne'ebé iha.

Nia hato'o ezemplu hanesan kazu hosi importasaun sira produtu sira "ne'ebé la kumpri kódigu alimentar sira nian" ka sira seluk no ne'ebé maka agora daudaun Timor-Leste "laiha dalan sira hodi halo protestu ida ka hodi lori asuntu ba tribunal arbitral ida.

SAPO TL ho Lusa