PN SUJERE ELEISAUN SUKU SEGUNDU RONDE UZA TINTA, PM RUI: LA PRESIZA

Haree ba preokupasaun públiku nian katak iha eleisaun Suku primeira ronde la uza tinta nune’e implika eleitores ba vota dala rua, reprezentante povu iha Parlamentu Nasional (PN) husu ba Comissão Nacional das Eleições (CNE) atu uza tinta nune’e bele identifika eleitores labele vota dala rua iha eleisaun segundu ronde nian.

Sujestaun Parlamentu Nasional nian nee, Primeiru Ministru (PM), Rui Maria de Araújo, hatete, la presiza uza tinta tamba gasta deit osan.

Eleisaun ba Xefi Suku sira iha segundu ronde ne’e, tuir planu sei hala’o iha Domingo (13/11/2016) mai.

Deputadu Partidu Demokratiku (PD), Adriano do Nascimento, hatete, relasiona ho akontesimentu ne’ebé CNE detekta katak iha eleitor ne’ebé vota dala rua iha eleisaun suku foin lalais ne’e, sujere atu prepara tinta iha vota fatin hodi bele limita eleitor vota dala rua.Tanba dala ruma ema ne’ebé vota dala rua tanba iha kartaun eleitoral rua.

“Ha’u sujere sosa tinta, ne’e dalan uniku, segundu antes eleisaun CNE tenki hatete sira nia dadus kona ba eleitor vota dala rua ne’e tanba sa? CNE mos tenki fo razaun, ema vota dala rua ne’e tanba saida? eleitoral rua ka tanba tekniku sira hakerek naran, ne’ebé ema ne’ebé mai vota tiha ona nusa maka nia mai vota tan,”dehan Deputadu Adriano do Nascimento iha PN, segunda (07/11/2016).

Adriano do Nascimento, mos lamenta foin lalais ba tuir vota iha postu aimutin maibe kandidata Xefi Aldeia sira la tau foto iha buletin votus tanba ne’e halo  eleitor sira konfuzaun.

“Laiha foto ferik ida mai husu ha’u dehan, ano ha’u atu vota ba ha’u nia oan naran hanesan ne’e, nia naran maka ida ne’ebé? ida ne’e konfuzaun permeiru, segundu sira ne’ebé servisu iha meza iha hanoin diak so que iha tendensia fali ezemplu nia esplika mai ami hotu dehan Xefi Aldeia nia foto laiha ne’ebé imi hakarak vota karik vota ida ne’e nia naran maka ne’e, depois nia foti ema ida nia naran katak kandidata Xefi Aldeia maka ne’e imi hakarak vota, vota iha ne’e, se nia koalia dala ida ou rua laiha problema mais hau observa nia koalia ida la para hela deit i temi deit kandidatu ida ne’e nia naran, depois hau husu ema ne’e ho kandidatu ne’e hansa, ema balun hatete mai hau dehan ida ne’e nia ria, ne’e hanesan uja kesempatan dalam kesempitan, maibe nia la sala, sala ne’e ami politiku, sala ne’e Governantes,”dehan nia.

Deputadu ne’e dehan tan, situasaun ne’e laiha sensibilizasaun, tanba povu barak lahatene lei, entaun Governante sira laiha sensibilidade katak kondisaun real ne’e povu barak lahatene lei lahatene hakerek, presiza foto hodi bele vota ba ema ne’ebé nia koñese, entaun problema iha ne’e.

Iha fatin hanesan, Deputada PD Lourdes Bessa mos lamenta ho fallansu sira ne’e, presiza buka dalan hodi rezolve, CNE nia knaar maka ida ne’e duni, tenki hakotu problema ne’e.

“Ha’u iha sentimentu rua, ida kandidata ba Xefi Aldeia hakerek deit ho liman iha buletin, ida seluk maka la tau sinal ba ema ne’ebé vota ona i laiha lista atu verifika ita nia naran iha neba duni ka lae, ida ne’e konsertesa bele fo dalan ba buat ne’ebé ladun diak, hau hanoin ita liu husi elisaun antes tia ona laos buat foun, ita tenki reve inklui mos Parlamentu tanba Parlamentu mos muda lei tomak, Parlamentu mos tenki halo izame konsensia ida alterasaun ne’ebé halo ba lei efetivu ka lae hamutuk ho instituisaun STAE, CNE,” dehan Deputada Lourdes Bessa iha PN.

Deputada Lourdes  mos sujere presiza halo investigasaun tanba orsamentu ne’ebé koloka ba eleisaun Suku ne’e bo’ot. Maibe kontinua hamosu fallansu.

PM Rui: La presiza

Maske nune’e, Primeiru Ministru (PM), Rui Maria de Araújo, hatete, eleisaun Xefi Suku segundu ronde agora, vontantes la presiza uza tinta, tanba gasta osan deit.

“Utilizasaun ba tinta  ne’e atu garante  katak, ema labele vota liu dala ida.  Agora  ita vota  iha Suku laran ita ba tau tinta halo saida,  ita mós koñese malu hela  ita ba tau ne’e halo saida,  ne’e  ita gasta  osan saugate deit to’o”esplika PM Rui ba  jornalista, sira iha SAMES, Kampo Alor, Segunda (07/11),  hodi responde  preokupasaun  públiku nian  kona-ba fallansu balun akontese iha sentru votasaun   ema ida    vota dala rua, tanba laiha tinta.

Xefi Governu  ne’e hatutan,  eleisaun Suku  tama ba segunda  volta  ne’e tanba lei iha Parlamentu Nasional aprova  define dehan  kandidatu ida deklara katak,  nia  manan eleisaun ne’e mais ou menus nia hetan 50%+1.  Agora  iha Suku barak  tanba kandidatu barak tebes  entaun  fahe  hotu.

“Tanba  ita respeita demokrasia  ema hotu-hotu  iha direitu kandidata-aan.   Ita bo’ot sira mós hatene eleisaun ida  ne’e  feto barak mak kandidata sira ninian, buat ida  ne’ebé mak pozitive tebes, mas ninia efeitus  ne’e mak fahe votus, kuandu   nia fahe  votus la to’o 50%+1 entaun tenki ba segunda volta tuir  lei hatete,”hatete PM Rui.

Tanba ne’e , PM Rui dehan,  Governu liub husi Ministériu Estatal halo tuir lei  ne’ebé iha. Teknikamente STAE  fó apoiu nafatin  ba autoridades komunitaria sira  ho postu administrative  atu hala’o segunda ronde.

 “Claro que   ita presiza gasta osan  oituan, mas demokrasia hotu karun  ita bo’ot sira haree eleisaun iha Estadu Unidu Amerika   ne’e mós hanesan,  tenki gasta  osan para demokrasia  ne’e la’o, tanba  demokrasia  ne’e mós faktor ida ba estabilidade  no dezenvolvimentu,” hatete PM Rui.

Kona-ba  montante orsamentu ba eleisaun Suku,  PM Rui dehan,  kestaun  ne’e kabe ba Ministéru Estatal. Maibe  ba eleisaun segunda volta la presiza osan barak, tanba sentru  votasaun ne’ebé sei loke  ne’e 300 ital deit  ona. Ne’ebé kompara eleisaun Suku primeira ronde  ne’e orsamentu  bo’ot liu oituan. Nes/avi

Jornal Nacional