Fundu Petróleu Investe OJE ho Pursentu 90

DILI, (ANTIL) –  Diretór Ezekutivu Jestaun Fundu Petróleu, Banku Sentrál Timor-Leste hatete, Orsamentu Jerál Estadu (OJE) hetan investimentu pursentu 90 hosi fundu petróleu, mesmu investimentu finanseiru TL seidauk iha kondisaun para lori fundu petróleu atu investe finanseiru iha rai-laran.

“Investimentu infraestrutura liuhusi orsamentu estadu para osan ida finanseiru ne’e labele kompete ho orsamentu estadu”, Venâncio Alves Maria hato’o iha nia aprezentasaun iha salaun Nobre Ministériu Negósiu Estranjeiru no Kooperasaun, foin lalais ne’e.

Venâncio Alves esplika, se kuandu lori hotu mai no ema rona Timor-Leste lori mai seidauk tan investe folin sasán sa’e dobru entaun bele fó impaktu ladi’ak ba ekonomia tanba, kapasidade ekonomia atu absorve osan seidauk bele tanba ne’e mak Timor-Leste deside investimentu finanseiru iha rai-liur.

“Ita mós menus kapasidade dezeñu, evaluasaun, selesaun, implementasaun projetu sira ne’e, karik investimentu finanseiru ita hakarak hadi’a infraestrutura ne’e tenke iha ema para halo evaluasaun ba projetu, karik fó retornu ka la’e sé ita investe iha projetu sira ne’e”, Venâncio haktenik.

Venâncio Alves hatutan investimentu iha rai-liur instrumentu ne’ebé kualidade no garantia bazeia ba nivel risku no espetativa retornu ne’ebé mak atu hetan.

Nune’e, lei fundu petróleu artigu 15.1 permite de’it investimentu finaseiru iha rai-liur no investimentu rai-laran liuhusi OJE. (jornalista: Maria Auxiliadora; editora: Rita Almeida)