Victoria sei Fahe Esperiénsia kona-ba Kuidadu Rai

DILI, (ANTIL) –  Organizasaun internasionál Land Care husi Austrália liuhusi nia reprezentante Konsellu Administrasaun, Victoria Mack sei marka prezensa iha Timor-Leste liliu Universidade Nasionál Timor Lorosa’e (UNTL), Kinta, (3/11) hodi fahe esperiénsia kona-ba kuidadu rai (land care).

Tuir informasaun ne’ebé ANTIL asesu husi komisaun organizadora, Segunda (31/10) katak, biban ne’e reprezentante Konsellu Administrasaun, Victoria Mack sei fahe esperiénsia kona-ba oinsá uza kuidadu rai nu’udar instrumentu ba sustentabilidade (Use Land care as tool for sustainability) liuhusi semináriu.

Bazeia ba ajenda ne’ebé prepara husi komisaun ne’e katak semináriu ne’e sei hala’o iha auditóriu UNTL, Kampus Liceu, D,  tuku 16.00 to’o 17.30, sei partisipa husi akadémiku sira hanesan dosente, estudante nomós akadémiku sira seluk ka instituisaun relevante.

Land Care nu’udar jestaun rekursu naturál husi estranjeiru ne’ebé mak hala’o nia atividade bazea ba komunidade (community-based). Organizasaun ne’e rasik hahú iha Austrália iha tinan 1986 no bazeada ba grupu komunidade lokál ne’ebé serbisu hamutuk atu hasa’e valór konservasaun no rekursu produtivu iha sira nia área.

Organizasaun ne’e harii ho objetivu atu reduz impaktu ba erosaun, salinidade, pesti ba aihoris no animál sira nomós hadi’a habitat nativu fauna no flora iha Austrália inklui hadi’a produsaun agrikola.

Land Care mós nu’udar modelu dezenvolvimentu maibé iha elementu barak ne’ebé mak halo nia iha diferénsia husi aproximasaun dezenvolvimentu típiku katak buat importante ne’ebé halo povu sira nia serbisu ho responsabilidade iha sira nia asaun. Atividade ne’e, babain hala’o ho apoiu husi fasilitadór lokál ka agénsia fasilitasaun nian sira. (jornalista: Rafy Belo; editora: Rita Almeida)