MP: Presiza Kontrolu Viaturas Liu Prazu Labele Tama Timor

Governu husu atu kontrola viaturas husi Indonezia ne’ebe tuan (data produsaun liu) ona atu labele tama mai rai laran hodi prevene asidente.

Membru Parlamentu Cesar Valente, husu governu tenke regula atu kareta sira ne’ebe nia data (tinan produsaun) liu ona atu labele mosu iha Timor-Leste no komunidade uza fali. 

“Dezastre hirak ne’ebe akontese durante ne’e kauza husi kareta antigu ona, kareta balun kondisaun grave tebes,” nia dehan. 

Alende ne’e, nia dehan iha kareta balun komunidade sosa maibe pesa laiha, ne’e hamosu implikasaun negative liu-liu ekonomikamente komunidade lahetan benefisiu husi kareta tuan sira ne’e. 

“Uza la to’o tinan soe hela deit no hamosu fali lixu,” Deputadu ne’e hateten. 

Tanba ne’e, nia husu ba governu atu halo kontrolasaun ne’ebe masimu ba viaturas ne’ebe tama mai Timor. 

Hatan ba kestaun ne’e Assesor Tekniko II Vise Ministeriu Obras Publiku, Transportes  e Komunikasaun (MOPTK), Basilio M. X. Teixeira, hateten governu sempre kontrola e kareta ne’ebe liu data produsaun seidauk tama mai Timor. 

“Foin produs no tama mai mak liu prazu ne’e iha, maibe kareta liu prazu mak tama mai ne’e seiduak iha, tanba ita iha lei ba ida ne’e no ami kontrolu hela,” nia hateten. 

Kona ba kareta sira ne’ebe liu prazu maibe kontinua sirkula ne’e, nia dehan governu labele bandu, tanba seiduak iha lei kona ba ida ne’e. 

Tanba nia kompara hanesan iha Singapur, sira iha lei hodi bandu viaturas liu prazu labele tama, inklui sira mos iha lei atu bandu viaturas liu prazu labele sirkula.

The Dili weekly