Fundu Petróleu Investe Pursentu 60 iha EUA

DILI, (ANTIL) – Diretór Ezekutivu Jestaun Fundu Petróleo, Banku Sentrál Timor-Leste, Venâncio Alves Maria informa, fundu petróleu Timor-Leste investe iha títulu nasaun soberanu sira no barak liu mak iha Estadus Unidus Amérika(EUA) kuaze porsentu 60.

“Restu barak iha Europa, maizumenus pursentu 10 hosi 16 billoens iha títulu nasaun sira aleinde Estadus Unidus Amérika”, Venâncio Alves hato’o iha aprezentasaun Konferénsia Nasionál Fundu Petróleo iha salaun Nobre Ministériu Negosiu Estranjeiru no Koperasaun, foin lalais ne’e.

Enkuantu investimentu Fundu Petróleu iha Timor-Leste investe liuhusi Orsamentu Jerál Estadu (OJE) hanesan investe iha doméstika liuhusi investimentu reál hanesan infraestrutura sira.

“Karik ita husu ita-nia án investimentu hanesan ne’e, sé ita investe finanseiru mak ba ida hanesan ne’e iha ka la’e, kualidade investimentu hanesan ne’e bele fó ita retornu hanesan ita investe iha rai liur?”, Venâncio haktenik.

“Tanba ne’e mak ita-nia fundu petróleo, investimentu ida finanseiru ne’e ita halo iha rai-liur para fó ita retornu tanba, ema nia nasaun sira ne’e regulamentu no lei sira forte no kualidade kompañia sira ita investe ba mós forte, garantidu no sira fó retornu mai ita mezmu ita tenke foti risku”, Venâncio esplika.

Venâncio afirma, enkuantu Timor-Leste hakarak retornu ne’ebé boot, mezmu investe iha rai-liur maibé nia risku iha nafatin más depende ba atitude no hakarak atu foti risku ne’e to’o iha ne’ebé? (jornalista: Maria Auxiliadora; editora: Rita Almeida)

Foto: Ezemplu statistika valór investimentu. Foto espesiál