KARIK GAM SAI OBJETU POLITIKA…?!

Jornal Nacional, editorial

Ikus – ikus nee komesa mosu fila fali ona konfrontus entre eis Grupo Arte Marsiais (GAM) hodi estraga komunidade sira nia uma, sasan no halo komunidade senti moris la hakamatek.

Iha tinan hirak liu ba konfrontus entre arte marsiais konsege doko situasaun iha rai laran, tamba problema arte marsiais nee involve mos membru F-FDTL no membru PNTL hodi komplika situasaun iha rai laran.

Problema arte marsiais nian iha governu Aliansa Maioria Parlamentar nee obriga Primeiru Ministru, Xanana Gusmão tenki tun direitamente iha tereno, bolu lider organizasaun arte marsiais halo juramentu iha CCD hodi hakribik violensia maibe kontinua mosu.

Xefi governu mos halibur membru F-FDTL, membru PNTL nebe mete arte marsiais halo juramentu iha Palacio Governu nian oin, no Konsellu Ministru reforsa ho resolusaun taka arte marsiais tolu, PHT, Kera Sakti no KORKA.

Maske resolusaun nee base legal dun forte hodi kesi grupo arte marsiais sira nee maibe Polisia ezekuta resolusaun hodi tama sai bairo sira, tama sa uma hodi kontrola treinamentu sira nebe arte marsiais sira nee halo.

Base ba resolusaun governu nian kuaze tinan hirak nia laran arte marsias tolu nee la halo aktividade treinamentu, konfrontus komesa menos. Grupo Arte Marsiais balu la halo treinamentui iha rai laran maibe ba halo treinamentu iha Indonesia hodi hasai sira nia sabuk.

Agora duvida mak nee resolusaun nebe governu hasai nee sei fale ka expira ona? oinsa kriminaliza GAM nebe sei ejisti?, maske la halo treinamentu aberta maibe sira kontinua organiza malu hodi buka problema.

Hakarak ka lakohi, governu tenki halo lei taka permanente arte marsiais sira nebe gosta kria instabilidade no buka halo problema iha rai laran tamba resolusaun nee laiha base legal nebe forte kondena arte marsiais nebe viola resolusaun nee.

Ne’ebe kompetenisa atu halo lei nee fila fali ba governu no parlamento nasional tamba orgaun soberano rua nee mak iha kompetensia halo lei. Inisiativa lei nee mai husi governu ka bankada parlamentar sira depois aprova iha Parlamento Nasional no presidente Republika promulga molok tama iha vigor.

Agora kestaun mak nee governu hakarak inisia lei ne ka lae? ka bankada parlamentra sira iha inisiativa hodi inisia lei nee hodi apresenta ba meja PN hodi diskuti ka lae? depende ona ba vontade diak orgaun soberano rua nee.

Se laiha lei ida hodi kesi metin Grupo Arte Marsiais sira nee mak konflitus grupo sira nee sei makaas liu tan tamba arte marsiais sira nee iha ninia intrese rasik, ida idak defende sira nia grupo.

Pior liu tan se tinan oin mai, kampaña eleitortal ba eleisaun presidensial no eleisaun parlamentar grupo sira nee politiku nain sira bele politiza tuir intrese partido politiku sira nian.

Ne’ebe antes tama festa demokrasia 2017, grupo sira nee tenki kontrtoladu ona, grupo sira nee regulariza ona, se lae bele estraga festa demokrasi. Li-liu partido politiku sira bele politiza sira ba intrese partido nian.

Nunee mos arte marsiais sira tenki tau an didiak, labele fasil monu ba manobra politiku nain sira nian tamba vitima laos politiku sira nee maibe pratikante arte marsiais sira, imi sira mak sai vitima.*