Reseita ne’ebé Timor-Leste simu sei liu estimativa ba tinan 2016 nian

Reseita la’os-petrolífera ne’ebé simu hosi kofre públiku timor-oan nian, sei liu fali espetativa tinan ne’e nian, ne’ebé uluk ho dolár milloens 171,42, hanesan folin ne’ebé aumenta pratikamente iha fulan novembru ninia klaran. 

Portál Transparénsia, ne’ebé fó sai kona-ba gastu no reseita hosi Estadu nian, to’o ohin, konfirma katak, bainhira hela de’it loron 46 hodi hakotu tinan fiskál, ezekusaun reál hosi reseita hirak ne’e hamutuk 99% hosi ida ne’ebé orsamentadu.

Estadu simu ona dolár milloens 169,63, falta atu ezekuta milloens 1,79.

Iha 2015, reseita Estadu liu fali ida ne’ebé previstu iha orsamentu, tanba ezekusaun totál hamutuk dolár milloens 193, 84, ka 113,8% hosi estimativa Orsamentu Estadu nian ne’ebé, besik milloens 170, 37.

Kona-ba despeza, ezekusaun orsamentál reál (pagamentu ne’ebé hala’o beibeik) besik dolár rihun milloens 1,09, ka 55,77% hosi orsamentu totál dolár rihun milloens 1,95.

Karik valór ne’e maka soma ho kompromisu milloens 274 no obrigasaun milloens 233,8, maka taxa ezekusaun nian sei sa’e ba 67,7%.

Iha 2015, Estadu ho ona ezekusaun reál hamutuk dolár rihun milloens 1,34, ne’ebé sa’e ba 90% karol soma ho kompromisu nomós obrigasaun hothotu, tuir saida maka fó sai iha Portal Transparénsia nian.

Taxa ezekusaun nian kiik, maski konta ho orsamentu inisiál ba tinan 2016, ne’ebé uluk ho dolár rihun milloens 1,56 no aumenta ba milloens 390 ho orsamentu retifikativu.

Karik konsidera valór inisiál hosi Orsamentu Estadu, maka taxa ezekusaun reál ba oras ne’e hamutuk 69,7%.

SAPO TL ho Lusa