Natalino: “Teme Iha Provas Ministru CNRT Involve Korupsaun Lori Ba Tribunal”

DILI – Xefi bankada CNRT Natalino dos Santos hateten, deputadu Jorge Teme iha evidensia forte dehan Ministru barak husi CNRT involve iha korupsaun lori ba Tribunal, laos julga no buka popularistas liu fali husi media.

Kestaun nee deputadu Natalino hatoo, hodi responde ba kestaun neebe deputadu husi bankada Frente Mudansa Jorge Teme neebe hateten, ohin loron ema rona Ministru husi CNRT barak maka involve kazu korupsaun, maibe nunka hasai sira nia imunidade hodi ba hatan iha Tribunal.

Hau hateten katak, bainhira se iha provas pur favour deputadu Jorge Teme eis Sekertariu Estadu iha Kuartu Governu, eis Ministru iha Kintu Governu bele lori membru Governu sira neebe nia mensiona halo korupsaun lori ba Tribunal, laos fo sai fali iha media hodi buka popularitas,” dehan deputadu Natalino ba jornalista sira iha PN, Dili, Tersa (15/11/2016).

Reprezentante povu nee haktuir tan katak, iha altura neebe kuandu iha kintu Governu partidu boot maka kaer Governu Jorge Teme mos tama iha laran, iha kuartu Governu partidu boot maka kaer nia tama iha Governu, tanba saida maka altura neebe Jorge Teme lakoi denunsiu, entaun nia mos kontribui ba korupsaun neebe maka iha.

Antes  nee deputadu husi bankada Frente Mudansa Jorge da Conceição Teme hateten, ohin loron ema rona Ministru husi CNRT barak maka involve kazu korupsaun, maibe nunka hasai sira nia imunidade hodi ba hatan iha Tribunal. Informasaun kompletu iha STL Jornal no STL Web, edisaun Kuarta (16/11/2016). Carme Ximenes

Suara Timor Lorosae