Retornu Janeiru To’o Setembru Millaun US $ 844.478

DILI, (ANTIL) - Durante Trimestre terseiru, entre Jullu – Setembru 2016, retornu husi Mina no Gas atinji millaun US$ 308, kompostu husi kupaun no jurus ne’ebé simu mak millaun US$ 81, mudansa iha valór merkadu nian millaun US$ 220 no movimentu cambiais millaun US$ 12.

Entertantu retornu husi Janeiru to’o Setembru 2016 ho totál millaun US$ 844.478, Diretór Ezekutivu Jestaun Fundu Petróleo, Banku Sentrál Timor-Leste, Venancio Alves Maria informa ba jornalista sira iha Dili, Sesta (4/11/2016).

Nune’e, rezulta rendimentu ba karteira fundu nian durante trimestre ne’e porsentu 1,89 enkuantu rendimentu sasukat (benchmark) nian ba períodu ne’e mak porsentu 1,89.

Venancio kontinua, reseita husi 1 Janeiru to’o 30 Setembru 2016 husi impostu ho totál millaun US$ 80.507 no reseita husi royalty entre Timor-Leste no Austrália hamutuk millaun US$ 101.67.

“Reseita seluk iha millaun US$ 6.088, normalmente mai husi pipe line rental fee. Totál husi reseita taxa, royalty, rental pipa hamutuk millaun US$ 187 no totál reseita husi investimentu billaun US $ 16 ba merkadu internasionál mak ita hetan millaun US$ 844 ”, Venancio dehan tan. (Jornalista : Maria Auxiliadora/Editór: Otelio Ote)

Foto: Diretór Ezekutivu Jestaun Fundu Petróleo, Banku Sentrál Timor-Leste, Venancio Alves Maria halo konferensia imprensa iha Dili, Sesta (4/11/2016). Foto ANTIL/ Maria Freitas