OJE 2017 BA PN $ 17,696 MIL, CARMELITA PREOKUPA JESTAUN KKFP

Orsamentu Jeral Estadu (OJE) 2017 ba iha Parlamentu Nasional (PN) nian rasik hamutuk U$ 17,696 mil.

Orsamentu OJE 2017 ba PN nian ne’ebe aloka ba iha gabinete Prezidente PN nian hamutuk U$ 9,115 mil, kompostu husi saláriu vensimentu U$ 5,116 mil, bens no serbisus U$ 7,934 mil. Transferênsias públikas U$ 930 mil, kapital menor U$ 3,620 mil, Kapital dezenvolvimentu U$ 96 mil.

Aleinde ne’e iha iha gabinete Sekretáriu-Jeral PN nian hamutuk U$ 132 mil  kompostu husi orsamentu ba bensi i serbisus nian hamutuk U$ 132 mil. Nune’e husi orsamentu PN nian ne’ebe aloka ba iha komisaun A,B,C,D,E no F nian hamutuk U$ 30 mil ne’ebe kompostu husi orsamentu bens i serbisus nian hamutuk U$ 30 mil.

Enkuantu aloka ba iha Konsellu Fiskalizasaun Sistema Nasional Intelijênsia Timor-Leste nian hamutuk U$ 100 mil, ne’ebe kompsotu husi orsamentu bens i serbisus nian hamutuk U$ 100 mil.

Orsamentu ne’ebe aloka ba iha Konselhu Konsultivu Fundu Petrolíferu (KKFP) nian hamutuk U$ 561 mil, kompostu husi bens i serbisus U$ 445 mill no mos kapital menor U$ 116 mil.

Orsamentu ba iha Grupu Mulheres Parlamentares Timor-Leste (GMPTL) nian hamutuk U$ 112 mil, kompostu husi bens i serbisus U$ 112 mil.

Husi diresaun administrasaun nian hamutuk U$ 4,815 mil, diresaun apoiu parlamentar U$ 318 mil, diresaun peskiza informasaun téknika U$ 257 mil. Divizaun teknolojia informasaun komunikasaun U$ 219 mill no Divizaun relasoens públikas, protokolu no seguransa U$ 29 mil.

Entretantu, Membru Deputada bankada CNRT, Carmelita Caetano Moniz kestiona ho sistema jestaun iha KKFP nian, tanba bainhira KKFP iha enkontru ho bainaka ruma sira gasta osan U$ 250 mil.

“Seña de prezensa husi KKFP hau rona katak, kada sira nia enkontru ou hasoru ema ruma iha valor U$ 250, será que ida ne’e los ita kompara ho konsellu sira seluk kada reuniaun sira la simu to’o ida ne’e. Ba ha’u ida ne’e boot teb-tebes 250 dollar por kada reuniaun,” kestiona Deputada Carmelita iha diskusaun OJE 2017 iha especialidade iha plenaria, Segunda (05/12/2016).

Hatan ba preukupasaun ne’e, Prezidente PN, Adérito Hugo da Costa esplika, kestaun ida ne’e regula tuir lei fundu petrolíferu ninian, tanba dezde tinan hirak liu iha diskusaun kona ba seña de prezensa ba orsamentu refere seriu tebes husi komisáriu sira nian.

“Kompozisaun husi komisariu sira ne’e mai husi entidades ne’ebe tuir prinsipiu lei fundu petrolíferu ninian, sira maka disidi montante hira ba sira nia serbisu seña de prezensa,” klarifika Prezidente PN, Adérito Hugo relasiona ho preukupsaun Deputada Carmelita Moniz nian.

Hugo hatutan, iha nivel elaborasaun iha tékniku foti ona kestaun no mos konselhu administrasau inklui komisaun C sira mos foti ona kestaun ne’e, ne’ebe koalia ho jestor sira iha KKFP tékniku sira deit la inklui komisariu sira,” esplika Adérito Hugo.

Portantu kestaun orsamentu ida kada reuniaun gasta U$ 250 mil redus husi montante proposta iha tinan anterior ho U$ 450 mil, tanba ne’e sira tenta atu hetan to’o orsamentu U$ 450 mil, maibe PN la konsege aprova nune’e mantein ho U$ 250 mil ne’ebe ejiste to’o ohin loron. mia

Jornal Nacional