KM Aprova Estratéjia Nasionál Empregu

DILI (TATOLI) -Ohin liuhosi reniaun Konsellu Ministru, Governasaun da-neen nian, aprova ona Estratéjia Nasionál Empregu ne’ebé aprezenta hosi Sekretáriu Estadu ba Polítika Formasaun Profisionál (SEPFOPE) ho Ministru Koordenadór Asuntu Ekonómiku (MEKAE).

Diretór Jerál ba Polítika no Empregu, SEPFOPE, Paulo Alves hatete tuir loloos rezolusaun Governu ba polítika nasionál ne’e halo uluk ona iha tinan 2011 to’o 2030 maibé depois hetan nia aprovasaun iha 2011 nia implementasaun ladún di’ak.

“Tanba ne’e mak ekipa SEPFOPE ho MEKAE servisu hamutuk lori filafali ita-nia estratéjia nasionál empregu hodi mai aprezenta iha Konsellu-Ministru para hetan aprovasaun,” Paulo Alves informa ba jornalista sira iha iha Palásiu Governu, Tersa (13/06).

Ba dahuluk, ekipa ne’e halo ona aprezentasaun iha loron 30 Maiu 2017 tanba iha korresaun husi membru Konsellu Ministru nune’e hadi’a filafali no ikus hetan duni aprovasaun no tuir orientasaun ne’ebé iha, ba oin hein de’it hodi halo implementasaun ba estratéjia nasionál emepregu ba governasaun foun ne’ebé mai.

Estratéjia nasionál mak hanesan baze dadus husi peskiza laborál ne’ebé SEPFOPE halo Ezemplu númeru dezempregu porsentu 11, entaun SEPFOPE nia projesaun husi 2017 to’o 2030 ne’e Timor bele hatún númeru dezempregu husi porsentu 11 ba hira? Husi meta sira ne’e klaru tiha ona nomós liga ba estratéjia nasionál dezenvolvimentu nian.

Entertantu planu ne’e la’ós halai ketak maibé aliña mós ho estratéjia nasionál Timor-Leste nian, liga mos ba Objetivu Dezenvolvimentu Sustentavel.

Traballu informál iha Timor-Leste daudaun ne’e iha porsentu 72, nune’e to’o fin 2030 ne’e redús númeru traballu no previzaun ne’ebé iha katak pelu menus iha 2030 hela de’it ho porsentu 20 ou 25.

Turi dadus ne’ebé iha, númeru dezempregu ne’ebé rejistradu iha SEPFOPE iha porsentu 11 hanesan peskiza ne’ebé halo iha 2013 hamutuk ho Ministériu Finansa no estimativa ba tarjetu ne’ebé halo kada tinan lima depois to’o 2030 númeru dezempregu bele hela de’it porsentu 5 tuir mehi ne’ebé atu alkansa.

Jornalista: Maria Auxiliadora | Editor: Manuel Pinto

Foto: Reuniaun Konsellu Ministru sira. Foto/GPM.