Feto Forte Nasaun Forte

DILI - Prezidente Partidu KHUNTO atual deputada Armanda Berta dos Santos hateten, Feto forte nasaun Forte, maske bele dehan hamutuk feto nain 23 deit iha PN, maibe nia parte sente orgulhu tanba partisipasaun feto hatudu katak feto mos bele.

Ema dehan Feto forte nasaun Forte maske bele dehan hamutuk feto nain 23 deit maka iha Parlementu Nasional, maibe hau  sente orgulhu tebes tanba feto  hatudu katak feto mos bele,” dehan Prezidente KHUNTO Armanda Berta dos Santos ba STL iha Parlamentu Nasional, Tersa, (05/09/2017).

Husi Partidu KHUNTO rasik, iha mos hanoin no esperansa ida atu nunee ba oin bele lori ho seriu asuntu feto no labarik nian ba tau iha prioridade.

Mai hau ida nee hanesan primeira vez, hau mai tur iha uma fukun Parlamentu Nasional, tanba nee hau agradese ami nia mandatu periudu 2017-2022 nee hau sei uza hodi sai duni portavoz ba povu tomak,” dehan Deputada Armanda Berta.

Tuir Deputada husi bankada KHUNTO nee katak, nia prontu atu servi ba povu tomak, laos deit ba feto maluk KHUNTO maibe ba feto maluk hotu-hotu, tanba nee nia mos agradese ba votus de konfiansa no suporta neebe maka partidu KHUNTO hetan, hein katak ho prezensa membru partidu KHUNTO nain 5 iha Parlamentu Nasional bele fo kontribuisaun neebe diak ba rai Timor ida nee.

Iha fatin hanesan Deputada husi Bankada PLP, Maria Angelina Lopes Sarmento hateten, feto nia partisipasaun laos atu kompleta deit rekejitus legais maibe atu halo intervensaun neebe konstrutivu no kualidade.

Feto nia partisipasaun laos atu kompleta deit rekejitus legais, maibe atu halo intervensaun neebe konstrutivu ho kualidade, no mos bele lori aspirasaun povu nian hodi sai realidade,”dehan Deputada husi PLP.

Tuir Deputada bankada PLP nee katak, kona ba asuntu feto ida nee asuntu nasional ida, sei laharee ba partidu A ou B nia interese.

Tanba nee, presiza tau ba prioridade no nesesidade, nunee bele fo benefisiu ba feto ho labarik hotu iha Timor Leste laran tomak.

Entertantu Dulcia Carvalho hateten, hanesan familia husi reprejentante uma fukun parlamentu nasional, nia iha esperansa ba deputadus foun sira neebe maka simu tiha ona tomada de pose. Bele halao duni sira knaar no responsabilidade hodi servisu ba povu tomak nia moris diak, sem haree ba kor ou rasa ka partidu. 

Maria Lay/Carme Ximenes | Suara Timor Lorosae