Maroko-Indonézia-Xina Sei Halo Atividade Peska Iha TL

DILI, (TATOLI) - Diretór Jerál Peska, Ministériu Agrikultura no Peska (MAP), Acácio Guterres informa kompañia tolu husi nasaun Maroko, Indonézia, Batan no Xina hatama ona proposta atu halo atividade peska industriál nian no sei halo parseria ho timoroan  balun.

Ba Proposta hirak ne’e parte kompetente daudaun ne’e halo hela pareser no ministru foun mai mak sei foti desizasaun ba kompañia tolu atubele hala’o atividade tanba tuir lei ministru mak tenke fó autorizasaun.

Entretantu proposta husi kompañia Maroko no Indonézia mai kleur tiha ona no Ministru haruka ona despaxu no husi Diresaun Jerál Peska orienta kompañia atu hatama dokumentu ró nian.

“Mas to’o ohin loron ami seidauk simu dokumentu ró husi parte rua ne’e, sira seidauk aprezenta no ami hein hela. Agora ida ikus (husi Xina) foin mak hatama proposta de’it, ami seidauk halo pareser tékniku, no depois ministru foun tama halo pareser fali no fó mós ba sira atu aprezenta lista,” Acácio hatete iha Komoro, ohin.

Entantu, daudaun ne’e iha Timor-Leste iha ona kompañia rua, Hong Long husi Xina no Best Seafood mak hala’o hela atividade peska iha parte tasi mane nian.

“Fulan ikus ne’e anin boot no ondas boot no ró sira agora balun la’o no balun para hela iha ninin no bainhira normál fali ona mak sira bele hala’o atividade fali, no daudaun tuir kondisaun tasi nian”.

Kompañia rua ne’e bainhira hala’o atividade iha tasi mane, kuandu hetan lisensa selu kedan ona reseita durante tinan ida nian tuir kuota ne’ebé fó ba sira.

“Husi Hong Long ita hahú iha novembru 2016 no termina iha novembru agora mai, ne’ebé sira selu tiha mil U$300.12 ne’ebé osan tama ona iha kofre Estadu, agora Best Seafood ne’e tanba hahú iha abríl tinan ida ne’e no sei termina iha abríl 2018 mai, ne’ebé sira selu tiha tinan ida nian tiha mak foin bá kaer ikan, hamutuk mil U$174 konforme kuota ne’ebé sira husu bazeia ba lei no selu tuir ikan saida mak sira kaer”.

Iha kompañia rua, Hong Long daudaun iha timoraon hamutuk 13 mak hala’o serbisu iha ró ne’e no Best Seafood iha timoroan na’in-tolu.

“Foufoun ita hatama ema na’in-75 maibé iha tasi-laran de’it balun la aguenta to’o semana rua de’it hakarak husu fila ona no agora daudaun iha 13 tolu de’it no ita hein buat hotu la’o di’ak mak ita foin atu rekruta tan fali joven sira ne’ebé hakarak serbisu, halo selesaun di’ak para bá ne’e serbisu ho di’ak”.

Jornalista: Maria Auxiliadora | Editór: Manuel Pinto

Foto: Diretór Jerál Peskas, Ministériu Agrikultura no Peska (MAP), Acacio Guterres. Foto espesiál