Deskonfia Xineza Manipula Kualidade Besi Beton

DILI - Komunidade Taibesi identifika kompania internasional (xineza) balun neebe halo atividade negosiu iha rai laran, hodi faan material konstrusaunmaibe halo mos manipulasaun ba kualidade ekipamentus besi betonhodi halo konsumidores sai vitima.

Tuir Antonio da Costa Moniz de Araujo, neebe sai hanesan Vitima ba manipulasaun husi loja Xineza nee, hateten nia parte lamenta tebes ho kompana Internasional (xineza) neebe mai loke loja konstrusaun iha rai laran hodi, falsifikasaun sasan sira neebe faan iha loja laran hanesan besi beton ho modelu 9 milli maibe, sira faan ba sosa nain sira dehan 12 mill.

“Hau mai hatoo problema nee iha  Ministeiru Komersiu Industria no Ambiente, tanba hau rasik sai ona vitima ba Kompana Wan Hay neebe loke loja hodi faan material konstrusaun  iha Taibesi, no kompania nee faan material konstrusaun maibe halo mos manipulasaun ba kualidadeBesi beton, Exemplu sira faan besi 9 milli maibe sira bosok ema dehan 12 milli, sorti hau iha alat sukat, se lae ami fiar los dehan besi 9 milli maka 12 milli,”dehan Antonio neebe sai ona vitima ba Loja Wan Hay, ba jornalista kuarta (06/09/2017) iha MKIA Fomentu Dili.

Nia mos informa tan katak, laos nia deit maka sai ona vitima ba sasan xineza sira nian nee, maibe iha ema barak ona neebe maka hela iha area Taibesi, nee kuaze sai vitima mos ba atitude manipulasaun husi Kompana Xineza sira nian. Tan nee, mai hatoo lamentasaun sira nee ba Governu, liu husi (MKIA) atu halo kontrola no tun dereita ba Kompana hodi fo xamada atensaun ba kompana Xineza nee.

Iha fatin hanesan, Diretor nasional Komersiu, Domingos Goterres hateten, los duni parte MKIA simu ona pedidu husi konsumedor sira iha Taibesi katak, iha kompana internasional balu falsifika no manipula kuantidade sasan Konstruksaun hanesan besi beton neebe ho tipu 9 Milli maibe faan ba sosa nain sira dehan 12 milli.

“Ami simu ona karta ida husi ita nia komunidade konsumedor sira katak, bain hira sira ba hola sasan iha loja balun, maibe loja nain halo manipulasaun ba kualidade besi beton, besi neebe 9 milli maibe sira manipula dehan 12 milli, ida neebe hahalok ida neebebe maka la diak, tan nee ita tenke tun ba haree hodi fo sansaun atu nunee eduka sira labele halo tan.”dehan Diretor Komersiu Domingos Guterres.

Tuir diretor katak, ho evidensia neebe maka komunidade sira lori mai ministeiru, MKIA sei tun dereita ba kolia ho kompana par abele fo samada atensaun, e bele mos hetan sasansaun tuir lei haruka.

Tuir lei artigu iha balun katak, bainhira negosiantes balu halo violasaun ba lei nee maka nia sei hetan multa U$ 2,000.00 Mill ka bele hapara kedas sira nia atividade de negosiu.

“Ita iha ona evidensia, taba nee ita sei tun dereita ba fo karta samada ba sira, tanba sira melangar ona lei neebe iha tanba nee, sira tenke multa too U$ 2,000.00 mill ka bele mos hapara sira nia atividade negosiu iha merkadu,”tenik nia.

Too notisia nee hatun STL seidauk hetan konfirmasaun husi kompania, ou loja nain Wan Hay neebe deskonfia halo manipulasaun ba kualidade besi beton. 

Madalena Horta | Suara Timor Lorosae