Moras Komplikadu, Inan Isin Rua La Salva Vida

DILI, (TATOLI) – Polémika inan feto Maria Pereira Pires hosi munisipiu Bobonaro ne’ebé  mate ho bebe iha isin tanba moras komplikadu hanesan tensaun alta, iis boot, bee nakonu iha pulmaun.

“Kauza hosi tensaun sa’e tanba isin rua no kauza bee tama pulmaun, tensaun alta no nia mate, bee nakonu iha nia pulmaun”, esplika Diretór Jerál Óspital Nasionál Guidu Valadares (ÓNGV), José António Gusmão liuhosi konferénsia imprensa iha ONGV, Bidau Toko Baru, Tersa (13/9).

Nia afirma, moras ne’e iha relasaun ho isin rua, preklamasia severál eh pasiénte sofre tensaun alta durante nia isin rua ne’ebé komplika ho edema pulmonál eh bee nakonu iha pulmaun tanba tensaun alta ne’e.

Nia haktuir, haree hosi istória, pasiénte ne’e mai ho iis boot, nia mai la’os atu partu tanba tempu atermu ona maibé seidauk tama faze traballu partu nian.

Hatan ba públiku nia preokupasaun kona-ba estajiadu mak atende pasiénte, nia dehan, ne’e la loos maibé parteira seniór mak fó atendimentu direta no fó aimoruk peransang atu hasai bebe ne’e mós la loos.

“Ami la’os atu defende no taka lia bosok, ita hotu mesak sarani, kuandu ita sala dehan sala no loos hateten loos”, afirma nia.

Servisu óspital nia atendimentu tuir servisu protokolu hodi halo tratamentu ne’ebé estandarte ba kazu ne’e, tanba ne’e hakarak hato’o katak médiku sira la taka buat ne’ebé la loos, matebian sei babeur no Maromak sei kastigu ami.

Pasiénte ho naran Maria Pereira Pires to’o iha óspital iha tuku 21:10 ho kondisaun iis boot, la hakmatek no labele ko’alia kuandu to’o emerjénsia no médiku sira halo kedan atendimentu.

Nia labele ko’alia, entaun nia kaben konta, antes ne’e nia iis boot ona iha uma, hakarak lori mai ospital mós lakohi, entaun domingu kalan nia komesa iis boot aumenta entaun família sira lori nia mai óspital no médiku sira fó atendimentu direta ho nia tensaun pursentu 80, saturasaun osijéniu ne’ebé tama pulmaun bainbain normál pursentu 100 maibé pasiénte ne’e pursentu 27.

Wainhira halo ezaminasaun ba pasiénte nia pulmaun maibé nakonu ho bee, médiku sira bele rona ruidu ne’ebé iha pulmaun laran, entaun pasiénte mós isin rua aproveita kedan koko hotu bebe maibé bebe nia kondisaun mós komesa tun ona.

Momentu tama iha tuku 21:10, tau kedan osijéniu, tau soru, hasai ran no teste ba laboratóriun no fó aimoruk ne’ebé nesesáriu duni ba kondisaun pasiénte nian hanesan aimoruk ne’ebé atu hatun nia tensaun.

Entaun tratamentu rutina halo no médiku espesialista hirak mai atu halo operasaun atu salva inan ho ona, iha tuku 21:10 kontinua halo tratamentu  no sira halo avaliasaun fali nia tensaun tun maibé seidauk ba normál.

Atu responde dehan atendimentu halo hosi estajiadu sira, ami hateten katak ne’e la los tamba sira iha kna’ar ne’ebé sira halo no sira labele halo, kuandu pasiénte sira ne’ebé ho kondisaun grave estajiáriu sira labele atende, iha momentu estajiáriu sira haleu pasiénte nia sorin atu kaer osijéniu, lori daun, lori aimoruk.

“Estajiáriu sira iha ne’eba atu apoia médiku, parteira sira maibé la’os sira mak fo atendimentu direita ba pasiénte” dehan nia.

Ho kondisaun ne’ebé komplikadu maibé médiku espesialista sira fó atendiementu ne’ebé rutina maibé iha finál pasiénte ho naran Maria Pereira Pires hosi Munisipiu Bobonaro la konsege salva nia vida.

Jornalista: Zezito Silva | Editora: Rita Almeida

Foto Espesial.