Governu Minoria sai Risku ba Estabilidade Governativa

DILI, (TATOLI) – Tuir João Almeida hosi Organizasaun Naun Govermentál, Fundasaun Mahein katak, governu koligasaun hosi partidu Frente Revolusionariu Timor-Leste Indepéndente ho Partidu Demokráriku (PD) sei iha risku ba estabilidade governativa tanba la’o ho minoria.

Dadaun ne’e, FRETILIN ho kadeira 23 iha Parlamentu Nasionál, PD ho kadeira hitu. Entretantu partidu seluk hanesan Kongresu Nasionál Rekonstrusaun Timor (CNRT-sigla portugés) ho kadeira 22, Partidu Libertasaun Populár (PLP) ho kadeira ualu no Kmanek Haburas Unidade Nasionál Timor Oan (KHUNTO) ho kadeira lima. Partidu ne’ebé la hola parte iha governasaun ho kadeira 35. Entretantu, partidu ne’ebé atu governa ho de’it kadeira 30.

“Estabilidade governativa sai risku iha governasaun, karik FRETILIN no PD avansa ho governu koligasaun minoria, enkuantu partidu KHUNTO la partisipa iha koligasaun”, komenta João Almeida ba ajénsia Tatoli, ohin.

Risku ba estabilidade governativa ida mós kuandu FRETILIN ho PD avansa ho koligasaun governu minoria signifika sei hetan risku iha parlamentu nasionál.

Kuandu parlamentu vota a favór programa no orsamentu, signifika bele garante estabilidade governativa maibé kuandu vota kontra ho governu minoria posibilidade bele mosu eleisaun antesipada.

Mesmu nune’e, nia sujere atu kontinua buka seluk atu garante estabilidade governativa hanesan ho insidénsia parlamentár.

Akordu koligasaun entre FRETILIN ho PD ne’ebé entrega ona ba Prezidente Republika, Francisco Guterres Lú Olo sei estuda hodi halo desizaun.

Tuir nia, kuandu partidu rua ne’e kontinua avansa, figura hanesan Kay Rala Xanana Gusmão ho Taur Matan Ruak nu’dar xavi hodi kontribui ba governasaun, nune’e bele dudu dezenvolvimentu ba oin.

Jornalista: Zezito Silva | Editora: Rita Almeida

Foto: Lider partidu FRETILIN, Mari Alkatiri ho PD, Mariano Assanami Sabino, ohin entrega akordu koligasaun ba Prezidente Repúblika, Francisco Guterres Lú Olo iha Palásiu Prezidente Nicolau Lobato. Foto Antonio Goncalves