Fundu Minarai Iha Trimestre Ikus Hamutuk Billaun U$16,69

DILI, (TATOLI) – Fundu Minarai Timor-Leste nian iha trimestre ikus ne’ebé termina iha loron 30 setembru 2017 hamutuk billaun U$16,69, informa Diretór Ezekutivu Jestaun Fundu Petróleu, Banku Sentrál Timor-Leste (BSTL), Venancio Alves Maria.

“Osan kontadu brutu fundu nian tama husi kontribuisaun kontribuinte, realeza (royalties) hamutuk millaun $126,79”, informa tan Venancio iha Banku Sentrál, ohin.

Reseita ne’ebé simu kompostu husi kontribuisaun kontribuente sira ba Fundu hamutuk millaun U$40,85, pagamentu realeza ne’ebé simu husi Autoridade Nasionál Petróleu millaun U$79,53 no annual pipe line fess millaun U$6.41.

“Osan kontadu líkidu ne’ebé sai husi Fundu durante trimestre ne’e hamutuk millaun $318,50 kompostu husi millaun $318 transfere ba Orsamentu Estadu no millaun $3,50 kobre kustu jestaun nian”.

Venancio hatutan reseita líkidu durante trimestre ne’e hamutuk millaun -$188,21.

Aléinde ne’e, rendimentu husi investimentu Fundu nian hamutuk millaun U$375,39 kompostu husi kupaun no jurus ne’ebé simu mak millaun U$84,68 mudansa iha valór merkadu nian millaun U$202,95 no movimentu kambiais mak millaun U$87,95 iha trimestre ne’e, nune’e rezulta rendimentu ba karteira fundu durante trimestre ne’e mak porsentu 2,29 kompara ho rendimentu sasukat mak porsentu 2,38.

Venancio relata, relatóriu trimestrál nian kona-ba lukru ka lakon hahú husi janeiru to’o setembru, rendimentu investimentu rasik hetan billaun U$1,25, tanba mudansa merkadu komesa di’ak uitoan, mezmu seidauk iha serteza ba polítika ekonomia mundiál, liuliu Estadu Unidu Amérika (EUA).

Hatutan tan, mas iha mundansa mós ba taxa juru iha EUA no European Central Bank tanba sosa fali títulu sira ne’ebé uluk fa’an ba públiku, komesa sosa fali, nune’e iha sinál pozitivu.

“Trimestre ida ne’e de’it ita hetan 371.12 milhões. Iha istória Fundu Petróleu rendimentu investimentu aas liu ona mak iha tinan ne’e”.

Diretór Ezekutivu ne’e informa mós, transferénsia ba Orsamentu Estadu iha trimestre ne’e hamutuk millaun U$318. “Mas iha tinan ida ne’e to’o setembru totál hamutuk millaun 735 ona sei iha restu 400 resin”.

Fundu Minarai antes ne’e iha trimestre dahuluk husi janeiru to’o marsu 2017 ho montante billaun U$16,26 no iha trimestre daruak nian ho totál fundu U$16,50.

Jornalista: Maria Auxiliadora | Editora: Rita Almeida