Nurima Alkatiri: OMP Latau Prioridade Ba Situasaun Emerjensia

DILI – Opozisaun Maioria Parlamentar (OMP) latau prioridade ba situasaun emerjensia neebe maka relasiona ho povu nia moris, tanba sira vota kontra pareser komisaun C neebe bele hatun orsamentu atu prosesa urjenti ba debate iha tempu badak.

Membru Komisaun Parlamentu Nasional husi komisaun C, neebe trata asuntu finansas Publika, deputada Nurima Riberio Alkatiri hateten, Oposizaun Maioria Parlamentar Vota Kontra Pareser Komisaun C neebe seidauk tama ba debate detail ba orsamentu, tanba pareser nee so para atu bele hatun orsamentu ba atu prosesa urjenti para debate iha tempu badak liu.

Sira (OMP-red) kestiona konaba valores numeru neebe mosu iha proposta Orsamentu ratifikativu nee, maibe sira mos lakohi fo dalan para iha tempu atu hatoo perguntas sira nee ba Governu, tanba pergunta sira nee laos deputadu maka atu hatan malu, nee tenke iha audensia ho Governu iha plenaria no Governu mos partisipa hodi aprezenta, depois ita nudar deputadu bele halo pergunta hodi klarifika, maibe ba ida nee deit mos sira lakoi depois maka halo diskursu oin-oin,” dehan deputada Nurima, ba STL, iha sala bankada Fretilin, Sesta (17/11/2017).

Reprezentante povu husi bankada Fretilin nee haktuir tan katak, Segunda semana oin sei lori fali pareser nee ba plenaria, plenaria maka sei deside fila atu hatun urjensia ka lae.

Iha fatin hanesan Xefi bankada Khunto Luis Roberto hateten, Governu haruka Orsamentu Ratifikativu mai iha Parlamentu Nasional hodi apresia, maibe horseik iha komisaun C pareser neebe maka komisaun C halo OMP vota kontra, neebe sei lori fali ba iha lider bankada.

Entretantu Ministru PCM Adriano do Nascimento hateten, Komisaun C nee laos vota kontra orsamentu, komisaun C nee relatoriu pareser, atu vota kontra ga lakontra nee mai iha plenaria. 

Carme Ximenes/Maria Lay | Suara Timor Lorosae