Polísia Guiné-Bissau uza gás lakrimojéneu hodi fahe manifestante sira

Polísia Guiné-Bissau nian uza gás lakrimojéneu hodi fahe grupu ida hosi partidu demokrátiku sira ne'ebé halo marxa, hafoin manifestante sira tenta invade Prasa Impériu iha Bissau, ne'ebé situa Prezidénsia Repúblika.

Kaer manifestante balun no balun kanek.

Seguransa aumenta ona iha Prasa Impériu, ne'ebé taka ona asesu ba fatin ne'e no fahe ona manifestante sira.

Polísia halo intervensaun, uza gás lakrimojéneu, bainhira partisipante sira hosi marxa sai hosi blokeiu sira ne'ebé instala hosi autoridade sira no tama iha Prasa Impériu hodi halo manifestasaun iha Prezidénsia Repúblika nia oin.

Manifestasaun, ne'ebé konvoka hosi koletivu, ne'ebé halibur partidu 15 no protesta Prezidente guiniense, José Mário Vaz, hakarak "resgata demokrasia" iha Guiné-Bissau.

Porta-vós hosi grupu partidu sira nian, Nuno Nabian, hatete ona iha loron-kuarta katak inisiativu ne'e konfirma ona hosi ministru Interior, Botche Candé, maski iha loron ida antes komisáriu-jeral hosi Polísia Orden Públika nian, Celso de Carvalho, informa ona ba organizasaun sira katak manifestasaun sira la hetan autorizasaun.

Iha loron-tersa, promotor sira hosi manifestasaun fó sai ona iha konferénsia imprensa karta ida ne'ebé aprezenta ba xefe Estadu solusaun sira hodi hakotu ho krizi polítika ne'ebé afeta nasaun.

Iha dokumentu, partidu hamutuk 15 eziji ba José Mário Vaz hodi demiti Governu hosi primeiru-ministru Umaro Sissoco Embaló tanba "la lejítimu, la tuir konstitusional no ilegal".

Nuno Nabian, kandidatu ne'ebé lakon iha volta daruak hosi eleisaun prezidensial ikus sira no líder atual hosi Asembleia hosi Povu Unidu, Partidu Sosial Demokrata (APU-PDGB) aviza ona katak laiha militante ida ka dirijente ida hosi koletivu ne'ebé sei hetan prejudika "hosi ema ruma" durante manifestasaun sira, ne'ebé nia hatete hanesan pasífiku.

SAPO TL ho Lusa