Fretilin-PD Deklara Aniceto Guterres Hatudu Fuan Boot

DILI – Bankada Koligasaun Fretilin-PD iha uma fukun Parlamentu Nasional deklara Prezidente Parlamentu Nasional Aniceto Guterres iha fuan boot, hodi simu nafatin ezijensi bankada oposizaun (CNRT,PLP no Khunto) nia hakarak.

Xefi bankada PD Maria Tereza Gusmao hateten, Atetude neebe maka ohin P-PN Aniceto Guterres halo hatudu katak, P-PN mos ses aan oituan husi ajenda neebe halo ona husi komisaun hodi simu nafatin ezijensia husi oposizaun nia hakarak.

“Se ita hare didiak P-PN aniceto Guterres hatudu nia fuan boot, tanba nia hakarak PPN ida neebe demokrasia duni, imparsial duni hodi rona ema hotu hotu nia hanoin liu liu oposizaun nia hanoin, nee duni atu rezeita ka larezeita OR ita hare ba prosesu neebe maka oras nee lao dadaun,” dehan deputada Maria Tereza, iha konferensia imprensa neebe maka halao iha sala bankada Fretilin, Segunda (18/12/2017).

Deputada Maria Gusmao haktuir tan katak, hare husi sistematika neebe oposizasun halo, hafoin Governu nee hari hare ona katak, laiha ona esperansa oposizaun vota afavour ba povu nia diak, bainhira oposizaun vota kontra nafatin, hatudu momos katak oposizaun lakoi duni povu nia diak.

Iha fatin hanesan Xefi bankada Fretilin Francisco Branco hateten sira hakarak komprende saida maka Prezidente Parlamentu Nasional hakarak atu hatudu katak, Prezidente ba Segundu oragun hirarkia Estadu Timor Leste neebe sai Prezidente ba Parlamentu Nasional, laos Prezidente ba grupu ida deit.

Entretantu Xefi bankada CNRT depuatdu Arao Noe hateten Rekursu nee sira halo kedan iha Segunda feira, kuandu iha reuniaun lider bankada katak, Prezidente lakohi ajenda rekursu mai plenaria. 

Carme Ximenes/Maria Lay | Suara Timor Lorosae