Rekursu Opozisaun Halo PPN Adia Tan Debate OR

DILI, (TATOLI) - Prezidente Parlamentu Nasionál (PPN), Aniceto Guterres deside adia tan debate jeneralidade Orsamentu Retifikativu (OR) biar ajenda tiha ona atu debate ohin, Segunda, (18/12) tanba, fó konsiderasaun ba pedidu opozisaun hodi debate uluk rekursu opozisaun nian, kontesta kona-bá despasu admisaun PPN ne’ebé admite Proposta lei OR ba debate normal depois pedidu urjénsia la pasa iha PN.

Rekursu ne’e, bankada opozisaun hatama hafoin partisipa iha plenáriu loron 20 de Novembru, maibe la ajende tanba PPN Aniceto haree tiha razaun sira ne’ebé mak opozisaun levanta iha rekursu ne’e hatudu la iha fundamentu tuir Rejimentu Parlamentu Nasionál (RPN), no pratika normal ne’ebé la’o iha Parlamentu Nasionál.

Biar nune’e, tanba ezijensia opozisaun, PPN Aniceto ikus mai deside ohin sei la iha debate ba proposta lei OR, no aban sei halo uluk debate ba rekursu opozisaun nian, hafoin ne’e mak debate proposta lei OR.

“Tuir giaun debate jeneralidade sei realiza iha loron 18 no 19 no hetan ona aprovasaun iha konferénsia lider bankada sira, maibé tenke adia tanba bankada opozisaun sira (CNRT, PLP no KHUNTO) ezije atu debate uluk rekursu admisaun ba proposta lei OR,” PPN Aniceto Guterres esplika iha plenária, Segunda (18/12).

“Aban marka plenáriu ba debate rekursu admisaun husi opozisaun. Sei Rekursu ne’e mak sai problema ohin no sidauk konsege hahú debate jeneralidade Orsamentu Retifikativu maski ajenda únika,” nia reforsa.

Hodi esplika nia entendimentu loloos tuir Rejimentu Parlamentu Nasionál, bainhira proposta lei OR tama ona iha PN la bele interrompe ho ajenda seluk, inklui rekursu ne’ebé opozisaun hatama ba meza PN. Maibé tanba mosu rekursu  hosi opozisaun signifika opozisaun rejeita proposta lei OR, sétimu governu nian, antes vota kontra iha plenáriu. Ho ida ne’e mak debate uluk proposta OR ou Rekursu nia rezultadu hanesan de’it.

Enkuantu OR nia importánsia seluk mak hodi responde polítika inserteza ne’ebé ohin loron governu no povu hasoru. Maski ejekusaun orsamental 2017 nian taka ona iha loron, 15 liu ba. OR nian importansia seluk mak atu sustenta funsionamentu mákina estadu hodi la bele paradu maski iha problema kona-bá governu ida tun no governu ida sa’e.

“Povu nia moris loron-loron tenke kontinua no labele depende ba governu ne’ebé mak ukun nune’e mós ekonomia tenke la’o nafatin,” Aniceto realsa.

Iha parte seluk xefe bankada CNRT, Arão Noé dehan rekursu ne’ebé hatama bazeia ba rejimentu Parlamentu Nasionál. Tanba ne’e, tuir loloos bainhira rekursu ne’e tama, PPN tenke admite kedan momentu ne’e no submete ba plenáriu maibé tanba kestaun seluk PPN la halo ajenda.

“PPN mak jere tempu mas atu deside loloos plenáriu mak soberanu, tanba ne’e submete ba plenáriu hodi foti desizaun.  Nune’e, ami ezije nafatin molok atu tama diskusaun jeneralidade Orsamentu Ratifikativu, rekursu ne’e sei iha fatin tanba la’ós sala ami nian, ita boot (Aniceto Guterres) admite maibé la ajenda,” Arão kestiona.

Jornalista: Julia Chatarina | Editór: Manuel Pinto

Imajen: Prezidente Parlamentu Nasionál (PPN), Aniceto Guterres