PFN Finaliza Plenaria Hodi Aprova Rezolusaun Lima, Relasiona Ho Problema Juventude

Parlamento Foinsa’e Nian (PFN) finalmente ensera sesaun plenaria ho aprozasaun rezolusaun tuir tematiku lima ne’ebe haktuir iha Politika Nasional Juventude (PNJ).

Rezolusaun hirak ne’ebe mak aprova husi menbru PFN sira durante plenaria liga ba asuntu lima, ne’ebe mak sai problema Juventude iha Timor-Leste, hanesan Juventude ho Edukasaun, Juventude ho Moris saudavel, Juventude ho partisipasaun Sivika, Juventude ho empregu no empregabilidade ikus liu Juvendute ho violensia no krimi, ne’ebe mak sai rezultadu ba problema ne’ebe joven sira hasoru iha sira nia moris.

PNJ sai nudar matadalan ba PFN hodi halo sira nia knar liu husi identifika dadus ne’ebe mak durante ne’e sira recolha iha 12 municipiu inklui RAEOA.

Prezidente Komisaun Organizadora, Zaulino Gomes da Silva hateten dinamika debate tuir nia observasaun durante loron lima nia laran ne’e diferente tebes entre PFN Periodu 2010-2013.

“Imi diferente los ho PFN periodu ida uluk liu, imi hatudu duni kultura debate ne’ebe mak iha, imi diferente ho ami uluk hanesan PFN, ami koalia deit saida mak ami koalia, ami la iha dadus ida mak ami bele fo sai,” hateten Zaulino.

Eis membru PFN Primeiru Perido, ne’ebe reprezentante hosi municipiu Viqueque ne’e, husu obrigadu ba Secretaria Estadu do Desportu e da Promoção e  Alta competição (SEDPAC) ne’ebe fo fiar ba Alumni Parlamentu Foinsa’e Timor-Leste (APFTL) hodi bele organiza plenaria PFN nian ba darauk, hodi husu ba SEDPAC atu kontinua fo konfiansa nafatin ba APFTL no APFTL sei la trai konfiansa ne’ebe fo.

Diretor Geral SEDPAC, Metodio Caetano Moniz hateten orientasaun sira mak iha hori uluk kedas ba PFN sempre orienta ba fini futuru.

“PFN nudar fatin hodi prepara lider ba futuru tamba ne’e hahu husi periudu primeiru to terceiru periudu ami iha orientasaun hanesan hodi prepara fini futuru nian hodi bele prepara lori nasaun ida ne’e ba oin,” tenik Metodio.

Entertantu PFN husi RAEOA nudar Presidente Meza ba plenaria daruak, Bruno Mario do Rosario Sombai nian iha nia liafuan agradesimentu hateten  buat hotu mak apredente durante ne’e, nudar bukae ida ba ami iha futuru.

Jesuino Marcal de Jesus | Tafara.TL | Editor: Zevonia Vieira | 15.12.2017 | Foto: Zinho MD