Diskusaun OR hatudu Governu nia inkompetensia; FDN apoia BOAMP salva K-RDTL

Eis Prezidenti Repúblika, atual Prezidenti Partidu Libertasaun Popular (PLP), Taur Matan Ruak, hateten, diskusaun Orsamentu Retifikativu (OR) iha Parlamentu Nasional (PN) ne’e, Governu atu hatudu de’it nia inkompetensia, tanba Governu rasik mós hatene katak, diskusaun OR ne’e, laiha ona espasu iha tempu hanesan ne’e.

“Antes ha’u mai Prezidenti PLP,  ha’u Prezidenti Repúblika, iha ha’u-nia tempu oras hanesan ne’e, diskusaun ba Orsamentu Retifikativu laiha espasu, ha’u lahatene tanba saida mak to’o ohin ita sei mangame hela, ida ne’e ita so hatudu de’it ita-nia inkomptensia,” katak Taur Matan Ruak ba jornalista sira iha sede nasional CNRT, Sesta (15/12).

Taur Matan Ruak dehan, diskusaun ba OR laiha ona espasu, tanba  ezekusaun Orsamentu Jeral Estadu taka ona iha loron 15/12.

“Lolos OR laiha kabementu, programa Governu mak iha kabementu, lolos Governu lori programa daruak ba Parlamentu Nasional, ne’ebé hetan ona rejeisaun iha primeiru,” katak Taur Matan Ruak.

Tanba ne’e, Taur Matan Ruak espera katak, deputadu sira husi Bloku Koligasaun labele obriga-an ba buat ne’ebé la merese atu halo.

“Ita labele silu-an tun sa’e para tama klot sira ne’e, ha’u eis Prezidenti Repúblika ha’u dehan, ha’u bingung oituan,” katak Taur Matan Ruak.

Alende ne’e, Prezidenti PLP ne’e dehan, AMP lakohi fó presaun ba Prezidenti Repúblika atu viola konstituisaun, maibé AMP hakarak desizaun Xefi Estadu nian tenki bazeia ba konstituisaun.

FDN apoia BOAMP salva K-RDTL

Nune’e mós, Forum Demokratiku Nasionál (FDN) ne’ebé harí husi partidu sira ne’ebé lahetan asentu iha Parlamentu Nasionál (PN),  kontinua fo apoiu ba Bloku Opozisaun Aliansa Maioria Parlamentar (BOAMP) hodi salva konstituisaun RDTL (K-RDTL) nu’udar baze ba konstrusaun Estadu Timor-Leste.

“Ami lakohi ema ida ka grupu ida atu hanehan fali konstituisaun RDTL, tanba nia (K-RDTL) mak bo’ot liu iha nasaun ida ne’e, tanba ne’e tempu to’o ona maun bo’ot Kay Rala Xanana Gusmão no Taur Matan Ruak ho sira seluk tan atu luta salva konstituisaun,” dehan portavoz FDN, Hermenegildo Kupa Lopes, ba jornalista iha enseramentu serimonia isar Bandeira tolu AMP nian iha Sede nasionál CNRT, KHUNTO no PLP, Sesta(15/12/2017).

Reprezentante FDN sujere, nu’udar líderansa ne’ebé diak, tenke hanorin sidadaun hotu tenke hakru’uk ba lei inan K-RDTL, tanba nasaun konstrui husi lei inan.

“Ami nu’udar partidu ne’ebé laiha asentu iha parlamentu nasionál, halibur malu, para oinsa atu fo hanoin ba lalaok ka situasaun polítika ne’ebé agora lao iha rai laran, katak krize lideransa ne’e mai husi minoria, la’os maioria, ita hakarak mak baze fundamental ba rai ida ne’e, sese de’it, sidadaun hotu iha rai ida ne’e  tenke hakru’uk ba konstituisaun, ema individual ka grupu ida, labele bo’ot liu fali lei inan,  ita temi nasaun,  tanba lei ida mak regula ita, Ita la’os atu odiu malu, ita halibur malu, oinsa atu apelu bebeik bai ta nia povu tomak, katak dalan ida atu hetan paz, estabilidade no atu hetan dezenvolvimentu diak mak tenke hakru’uk ba lei konstituisaun RDTL,” dehan Kupa.

Forum Demokratiku Nasionál ne’e, kompostu husi partidu 12, ne’ebé la hetan asentu iha Parlmentu Nasionál. Cos/Say

GMN | Grupo Media Nacional