Governu Husu Air Timor ho TransNusa Fa’an Tiket Labele Karu

DILI, (TATOLI) - Ministru Negósiu Estranjeiru no Kooperasaun, Aurélio Guterres, reprezenta xefe governu konstitusionál da-hitu sujere ba kompania áerea, Air Timor no TransNusa Mandiri, Indonézia atu fa’an eh fó presu tiket ne’ebé la bele karu ba pasajeiru sira maibé tuir nível ekonómia povu Timor-Leste (TL) no Nusa Tenggara Timur (NTT), Indonézia nian.

“Ida ne’e mak ami husu,” subliña ministru Aurélio reprezenta Primeiru-ministru Marí Alkatiri, iha aeroportu Interenasionál Nicolau Lobato, Comoro-Díli, sesta (15/12) iha inagurasaun vou aviaun TransNusa, Díli ba Kupang no Kupang mai Díli.

Nia hatutan, ho operasaun aviaun TransNusa ne’e mós bele ajuda, nune’e iha kontaktu barak liutan entre povu iha ámbitu ekonomia, kultura, ne’ebé povu rai rua hanesan no sente konfortável liu, livre liu ba mai tuir regra sira ne’ebé mak vigora.

Nune’e mós espera katak ho operasaun aviaun husi Kupang mai Díli, husi Díli ba Kupang bele ajuda ita-nia atividade ekonomia sira sai intensiva liutan. Alende atividade ekonomia, ita mós hatene katak povu timoroan sira barak mós liu-liu estudante timoroan sira ne’ebé mak estudu iha NTT.

“Husi ita espera katak husi parte polítika governu Timor-Leste hakarak fó ajudu oi-oin atu fasilita fluénsia operasaun aviaun Timor-Leste ba Kupang no husi Kupang mai Timor-Leste,” espera governante ne’e.

“Husi parte tékniku ami mós hakarak husu ba empreza rua, Air Timor no PT. TransNusa Aviation Mandiri atu presu tikete Kupang mai Díli, ho presu ne’ebé mak bele atinji husi povu nasaun rua ka rai rua, Oeste no Leste tuir nível ekonomia povu rai rua nian,” nia reforsa tan.

Ministru Aurélio lori xefe ezekutivu governu konstitusionál da-hitu nia naran akresenta katak governu Timor-Leste iha prioridade lubuk ida, prioridade prinsipál ida mak ekonomia iha kontestu ekonomia ida ne’e presiza infrastrutura inklui transportasaun aero no bele ajuda mobilidade sidadaun sira nian, nu’udar atór ekonomia husi nasaun rua, liu-liu Timor-Leste no NTT (Nusa Tenggara Timur).

Iha fatin hanesan Asistente Ekonomia no Dezenvolvimentu reprezenta governadór Kupang,  Alesandre Sena hateten, nasaun rua iha rekursu oi-oin no kresimentu ekonomia ne’ebé signifikadu, ida mak ho aumentu vizita sidadaun Indonézia ba Timor-Leste nomós kontráriu.

Maka Kupang, Díli sei dezenvolve liutan hodi atinji sosiedade ne’ebé prospéru. Loke aan liutan no koñese husi mundu li’ur.

Vou ida ne’e atu dudu ekonomia no negósiu nomós eleva ekonomia povu nian. Ho vou ida ne’e, bele fasilita transportasaun terenu no marítima nomós fasilita parte investasaun no implikasaun ba iha setór turizmu iha NTT nomós TL.

“Ha’u espera vou ida ne’e bele opera ho seguru no bele fó servisu ne’ebé di’ak liu ba povu. Ha’u espera parte aviasaun sei fó atendimentu ne’ebé di’ak liu ba nasaun rua,” hateten Alesandre hodi sita governadór NTT nia liafuan.

Nune’e, tuir nia, ita-nia mehi atu halo ligasaun entre nasaun rua sai realidade. “Ba oin, ha’u espera ho vou ida ne’e fó impaktu ne’ebé pozitivu prinsipalmente ba Indonézia no Timor-leste enjerál. Fiar katak fó kór foun ba transporte aerea iha Kupang no Díli,” nia reforsa.

Entretantu partisipa iha inagurasaun vou husi TransNusa Aviation Mandiri, rute Kupang-Díli, no Díli-Kupang ne’e partisipa mós husi eis-prezidente Repúblika José Ramos Horta, Vise-ministru Transporte no Komunikasaun, Inácio Morreira, Ministru Turizmu, Manuel Florêncio Vong, Ministru Petróleu, Hernâni Coelho nomó seluk tan inklui autoridade Indonézia iha Timor-Leste nomós husi Indonézia rasik.

Jornalista: Rafy Belo | Editór: Manuel Pinto