ANC-PSIK Asina Protokolu Kooperasaun Hodi Kombate Sibernétika

DILI, (TATOLI) – Iha biban fórum komunikasaun Nasaun ne’ebé ko’alia lian portugés (CPLP-sigla portugés) 9o, Autoridade Nasionál Komunikasaun (ANC-sigla portugés) nomós Polísia Sientífika Investigasaun kriminál (PSIK) asina protokolu kooperasaun atu kombate sibernétika.

Diretór Nasionál PSIK, Vicente Fernandes Brito, hateten seremónia lansamentu protokolu kooperasaun ne’e hatudu Timor-Leste iha avansa teknolojia iha área informátika.

“Ohin seremónia asinatura protokolu kooperasaun entre PSIK  no ANC hatudu katak ita iha avansa teknolojia iha área informátika lori dezenvolvimentu ne’ebé mak fó benifísiu ba ita nia povu no sosiedade maibé iha tempu hanesan lori mós kustu negativu”, tenik ba jornalista sira iha edifísiu Ministériu Finansa, ohin.

Hodi dehan dala ruma ema balun utiliza maneira oin-oin hodi altera dadus no programa nomós halo sustituisaun iha dadus sira.

Tuir nia aktu ne’e halo prejuízu boot ba Estadu, tanba ne’e kooperasaun no kordenasaun entre órgaun internál Nasaun tenke iha nune’e hamutuk hodi kombate nomós prevene tipu krime ida hanesan sibernétika.

Alende ne’e nia akresenta, parte seluk hatudu katak ho kooperasaun ida ne’e fó alerta nomós sinál ida ba ema sira ne’ebé mak ezekuta krime refere para bele fó hanoin ba sira katak Timor-Leste la’ós fatin atu realiza krime ne’e.

Maske nune’e, nia dehan la fásil tanba presiza medida barak hanesan koooperasaun no koordenasaun entre ANC no PSIK, maibé kooperasaun ne’ebé ohin asina hanesan pontu hahú ba futuru, hamutuk ho Governu no Estadu atu kombate krime ne’ebé mak sai proukupasaun iha komunidade.

“Sibernétika ninia lala’ok la’os krime bain-bain tanba dalaruma ema temi katak krime organizadu no transnasionál ne’ebé mak lori prejuízu bot ba komunidade no dala ruma ema nia osan, programa no dadus bele lakon”, katak.

Nune’e nia realsa perspektiva investigasaun kriminál tenke uza rekursu oin-oin hanesan ekipamentu, formasaun ne’ebé bele suporta órgaun sira hanesan autoridade reguladór, komunikasaun nomós polísia kriminál sira, nune’e bele kombate no prevene atividade sibernétika.

“Dalaruma ema uza sosiál mídia hanesan Facebook, mídia komunikasaun sosiál no elektróniku atu bele komete krime. Tanba ne’e mak ita tenke hola medida imediatu liuhosi kooperasaun sira no ita bele tau forsa atu bele kombate sibernétika iha ita nia rai”, tenik tan.

Hodi haktuir, iha ámbitu investigasaun kriminál PSIK sempre halo prosesu investigasaun, bainhira iha denúnsia iha PSIK, sei remete ba Ministériu Públiku atu halao investigasaun nomós iha medida prevensaun. “Iha prosesu balun halo ona investigasaun maibé tanba segredu justisa labele fó sai ba públiku”.

“Sibernétika hanesan krime ida hala’o liu ema ida maibé ita labele sita atu asegura segredu justisa atu ema labele pertuba investigasaun no fó prezuízu ba prinsípiu prevensaun ba inosénsia”, afirma.

Kooperasaun ne’e bele posibilita atu bele asesu ba mídia ka dokumentu ruma tuir prosedimentu legál no labele asesu arbiru.

Jornalista: Julia Chatarina | Editora: Rita Almeida