Governu Anterior Gasta Osan Barak, Obra Laiha Kualidade

BAUCAU, (TATOLI) - Primeiru Ministru (PM), Marí Alkatiri konsidera katak Governu anterior ne’ebé lidera hosi partidu seluk lahó jestaun nune’e gasta osan barak (billons 14) maibé obra laiha kualidade.

“Sira bolu Sétimu Governu Konstitusionál ne’e Governu Jestaun, entaun ha’u bolu Governu ida uluk ne’e Governu lahó jestaun tanba gasta osan bar-barak maibé rezultadu mukit no balun iha rezultadu maibé gasta osan ho ezajeradu,” Xefe Governu dehan asuntu ne’e liuhusi Konsultasaun Programa Sétimu Governu Konstitusionál ba autoridade munisípiu, autoridade lokál, veteranu, reprezentante Igreja Katólika, reprezentante partidu polítiku, reprezentante sosiedade sivíl no komunidade Baucau ne’ebé hala’o iha Sentru Konvensaun Baucau, Vila Antiga, Postu Administrativu Baucau Vila, Munisípiu Baucau, Sesta ne’e.

Nia rekoñese katak iha ona eletrisidade hale’u Timor laran tomak, maibé folin harii eletrisidade iha Timor karun liu iha mundu.

“Ita konta loloos folin eletrisidade iha kada munisípiu ho montante kuaze miloens $130. Ne’e karun tebes maibé povu barak seidauk asesu (eletrisidade),” nia informa.

Marí hatutan Governu anterior promete liuhusi Planu Estratéjiku Dezenvolvimentu Nasionál (PEDN) aprovadu tinan 2011 atu dada bee-moos maibé seidauk konsege halo, halo duni dezenvolvimentu infraestrutura (estrada) maibé laiha kualidade (dura fulan neen de’it át ona).

 “Ita kontinua Planu Estratéjiku Dezenvolvimentu Nasionál ne’ebé maka Governu uluk halo ona, saida maka halo di’ak ita hametin, ida ne’ebé maka ladi’ak ita hadi’a, ida ne’ebé seidauk halo ita halo,” nia esklarese.

Programa Sétimu Governu Konstitusionál, Marí esplika, iha planu katak tenke iha zona dezenvolvimentu espesiál rua ka tolu tan iha Timor-Leste atu aselera dezenvolvimentu.

Jornalista: Xisto Freitas | Editór: Manuel Pinto

Imajen: Primeiru-Ministru, Marí Alkatiri.