quinta-feira, 22 de março de 2018

Ministru: Governu timoroan bele foti to'o 250M USD hosi Fundu Petrolíferu

PARTILHAR

Governu timoroan bele halo levantamentu ida ho folin dolar millaun 200 to'o 250, to'o fulan-Jullu, hosi Fundu Petrolíferu hodi finansia Estadu, maski iha esforsu hosi "kontensaun", hatete hosi ministru Planu ho Finansa ba Lusa.

"Ami mantén esforsu kontensaun ba gastu no ami seidauk hasai buat ida hosi Fundu Petrolíferu. Ami halo hela kálkulu ida to'o fulan-Jullu no ami kalkula katak tenki hasai entre millaun 200 no 250" (entre euro millaun 162 no 202), afirma hosi Rui Gomes.

"Ne'e sei permiti aumenta fundu sira Estadu nian to'o hahú hala'o orsamentu foun", nia refere.

Timor-Leste hala'o rejimi duodésimu hahú hosi inísiu tinan ne'e, impaktu ida entre impaktu sira seluk hosi krizi polítika nasaun nian ne'ebé iha parlamentu disolvidu no ne'ebé sei halo eleisaun antesipadu iha loron 12 Maiu.

Tuir Rui Gomes, Governu buka kontrola to'o máximu gastu públiku sira ne'ebé iha fulan-Janeiru ho fulan-Fevereiru aumenta ba total ida dolar millaun 122 (euro kuaze millaun 99), ka 62% hosi limiti máximu posível iha rejimi duodesimal.

"Iha fulan-Marsu ami antesipa gastu entre millaun 70 no 80 [entre euro millaun 57 no 65] no iha fulan-Abril menus liu. Ami gasta ho rigor tebes", nia refere.

Ministru timoroan konfirma ona katak situasaun polítika hamosu daudaun impaktu iha situasaun ekonómiku, ho nasaun "tama iha resesaun", maski buat hotu aponta de'it hanesan "períudu temporáriu ida".

"Ami bele dezenvolve fali iha fulan-Agostu ka fulan-Setembru bainhira hahú hala'o orsamentu foun", nia hatutan.

Informasaun hosi Ministériu Finansa refere katak iha fulan-Fevereiru ezekusaun maka 88,1% iha saláriu ho vensimentu sira, hosi 39,5% iha sasán ho serbisu sira, hosi 55,3% iha kapital dezenvolvimentu nian, hosi 63,6% iha transferénsia públika no hosi 76,1% iha gastu kontijéntiku nian.

Ba fulan-Marsu, Estadu iha orsamentu ida hosi dolar millaun 104,63 (euro millaun 84,74).

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: