STAE Hahu Verifika Lista ParPol Ba EA

DILI, (TATOLI) – Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE halo ona verifikasaun ba lista kandidatura partidu polítika (ParPol) sira ne’ebé aprezenta ba Tribunál Rekursu (TR).

“Ami simu ona lista kandidatura partidu polítiku sira hosi Tribunál Rekursu, ami verifika ona tantu hosi partidu bloku koligasaun ho partidu polítiku hirak ne’ebé avansa mesak,” Diretór Jerál STAE ba Ajénsia Tatoli iha Golgota, Comoro, Kinta (22/03) hafoin hasoru malu ho Polisia Nasionál Timor-Leste (PNTL) atu informa kona-ba preparasaun STAE nian ba eleisaun antesipada, nune’e seguransa sira bele asegura prosesu tomak.

Movimentu Dezenvolvimentu Nasionál (MDS), Aliansa Mudansa ba Progresu (AMP), Frente Dezenvolvimentu Demokrátiku (FDD) inklui partidu KOTA, PEP no PR. STAE verifika daudaun.

“STAE to’o agora simu ona lista atu apoiu verifikasaun iha partidu tolu no bloku koligasaun haat,” nia dehan tuir.

Prosesu verifikasaun eleisaun antisipada la demora kompara hanesan eleisaun prezidensiál no lejizlativu ne’ebé mak liu ona. Ho razaun, eleisaun antesipada só verifika lista kandidatura deputadu na’in 90, na’in 65, tama iha lista definitivu no suplente hamutuk na’in 25.

Enkuantu elisaun ne’ebé liu ona tenke verifika mós apoiante sira hamutuk ema na’in 5000, maibé eleisaun agora.

Hosi prosesu verifikasaun, STAE nia elejibilidade ba lista ne’ebé mak tama no sei hato’o ba Tribunál Rekursu ho rezultadu verifikasaun hotu.

Iha parte seluk, partidu Frente Revolusionáriu Timor-Leste Independente (Fretilín), Partidu Demokrátiku (PD) inklui Asosiasaun Sosiál Demokrátiku mak seidauk hato’o ba STAE atu halo verifikasaun, maibé nia garante katak TR sei hatama sedu atu órgaun eleitorál bele verifika lais.

Iha prosesu verifikasaun, bainhira STAE hetan irregularidade ruma mosu sei hato’o ba TR atu fó hatene ba ParPol refere hodi kompleta, durante prosesu verifikasaun iha prazu loron 10. Hafoin ne’e iha tempu ba loron rua TR notifika kuandu iha irregularidade.

Tuir prosedimentu hafoin simu lista kandidatura hosi Tribunál Rekursu (TR), sei iha loron 10 ba TR atu verifika irregularidade tantu iha relasaun ho elejibilidade, TR sei iha tempu atu notifika partidu refere hodi kompleta no ParPol bele halo rekursu no TR sei fó resposta.

Jornalista: Zezito Silva | Editór: Manuel Pinto

Imajen: Diretór Jerál Sekretariadu Tékniku Administrasaun Eleitorál (STAE), Acilino Manuel Branco. Foto STAE