sexta-feira, 13 de abril de 2018

Eleisaun: Kampaña hahú lahó insidente maka'as sira, kontinua halo preparasaun


Loron dahuluk sira hosi kampaña ba eleisaun lejislativu antesipadu iha loron 12 Maiu iha Timor-Leste hala'o lahó insidente maka'as sira no lahó kesar ruma hosi partidu polítiku sira, hatete hosi prezidente Komisaun Nasional Eleisaun (CNE) nian iha loron-kinta ne'e.

Iha konferénsia imprensa, Alcino Baris hatete katak hahú hosi loron-tersa, bainhira hahú kampaña, rejista de'it "insidente ki'ik sira" ne'ebé rezolve "lalais", inklui kolokasaun hosi bandeira partidáriu ida iha eskola ida.

"CNE kontinua vijia no akompaña kampaña tomak. Husu ona ba media hodi mantén esforsu hodi halo notísia ho loloos no fó informasaun adekuadu", Baris hatete.

Konferénsia imprensa halo hafoin enkontru ida entre responsável sira hosi CNE ho Sekretáriadu Tékniku hosi Administrasaun Eleitoral (STAE) hodi konfirma númeru hosi eleitor sira ne'ebé resenseadu no aspetu sira ne'ebé iha relasaun ho sentru sira votasaun nian.

Informasaun provizóriu hatudu katak ema sira ne'ebé bele vota iha total hamutuk eleitor 788.820, na'in 1.532 iha Austrália, na'in 537 iha Koreia-Súl, na'in 1.286 iha Irlanda-Norte (ne'ebé sei iha fatin sira votasaun nian ba dala uluk), na'in 778 iha Portugal no na'in 2.128 iha Reinu Unidu.

Previzaun hatudu katak sei prepara sentru votasaun ida ho total hamutuk 885, sentru sia sei prepara iha estranjeiru, no estasaun votu sira ho total hamutuk 1.118.
Valor definitivu sira sei haruka hosi STAE, iha loron-kinta ne'e, hodi publika iha Jornal Repúblika.

SAPO TL ho Lusa

Sem comentários: