Grupu UNIJMA Deklara Vota FRETILIN iha Eleisaun Antesipada

HERA, (TATOLI) – Grupu Uniaun Nasionál Juventude Maubere (UNIJMA)/eis Grupu CPD-RDTL deklara ofisialmente sei fó sira nia apoia totál ba partidu Frente Revolusinariá Timor-Leste Independente (FRETILIN) atu bele manán iha eleisaun antesipada iha 12 maiu tinan ne’e.

Razaun fó apoiu ba FRETILIN tanba FRETILIN iha misaun rua ne’ebé importante maka libertasaun pátria ne’ebé atinje ona iha tinan 1999 no libertasaun povu ne’ebé to’o ohin loron seidauk atinje no UNIJMA fiar katak ho FRETILIN bele kore povu hosi mukit no ki’ak.

“Husu ba membru UNIJMA ne’ebé namkari iha rai laran no rai li’ur atu fó apoiu ida-idak nia votu ba partidu FRETILIN hodi halo ekilibriu, tanba daudaun ne’e partidu ki’ik no boot halai hamutuk hasoru FRETILIN hodi repete fali istória uluk nian”, Sekretáriu Jerál Grupu UNIJMA, Gil Ferdes, liuhusi konferénsia ba imprensa ne’ebé hala’o iha Suku Hera, Postu Administrativu Kristu Rei, Munisípiu Dili, ohin.

Gil hatutan apoiu votu hosi membru UNIJMA ba FRETILIN nu’udar misaun konkreta ida ne’ebé halo parte misaun boot kona-ba konsolidasaun Estadu RDTL ho nia instituisaun sira tanba instituisaun hirak ne’ebé durante ne’e sai fo’er, liu-liu hosi abuzu poder no Korupsaun, Koluzaun no Nepotizmu (KKN), só FRETILIN maka bele hamoos no hadi’a.

“Husu mós ba Povu Maubere jerál ne’ebé iha eleisaun jerál 2017 vota ba partidu FRETILIN nia vitória, tenke vota nafatin ba FRETILIN ho nia programa hodi manán tan iha eleisaun ida ne’e, tanba bee-dalan ba progresu iha suku no aldeia ne’ebé intupidu ho abuzu poder no KKN  hodi la fó benefísiu di’ak ba povu k’ik sira, só FRETILIN maka bele hamoos no hadi’a nune’e bele lori benefísiu real ba povu”.

Konferénsia ba imprensa ne’e la’ós de’it partisipa hosi estrutura nasionál UNIJMA maibé partisipa mós hosi estrutura UNIJMA hosi munisípiu 13.

Jornalista: Xisto Freitas | Editora: Rita Almeida

Imajen: Portavóz UNIJMA, Gil Ferdes hamutuk ho estrutura UNIJMA ko'alia ba jornalista sira. Imajen Ajénsia TATOLI/dok.