Lere: Ha’u nia preokupasaun iha forsas armadas mak prepara jerasaun foun

Xefi Estadu Maior F-FDTL, Major Jeneral Lere Anan Timur hateten, nia preokupasaun agora ne’e iha forsas armadas mak prepara jerasaun foun sira, ho di’ak atu bele troka sira ne’ebé katuas ona atu bele apoia malu hodi lori instituisaun F-FDTL ba oin.

“Ha’u nia preokupasaun agora ne’e, iha forsas armadas mak prepara jerasaun foun atu bele mai troka ami katuas sira,” hateten Major Jeneral Lere Anan Timur ba jornalista sira hafoin enkontru ho Prezidenti Repúblika, Francisco Guterres Lú Olo iha Palásiu Prezidensial Nicolau Lobato Díli, Kuarta (11/4).

Tanba ne’e Lere Anan Timur hateten, agora dadaun nu’udar Xefi Estadu Maior F-FDTL, prepara ona proposta promosaun ofisiais na’in 4 F-FDTL nian, hodi promove ba Major Jeneral hodi apoia servisu instituisaun nian.

“Prosesu ne’e la’o hela, seidauk iha promosaun, Ministru Defeza sei lori proposta ha’u nian ba Konsellu Ministru no sei aprova hodi lori ba Prezidenti Repúblika nu’udar Komandante Supremu forsas armadas atu dekreta i públika, i ida ne’e mak to’o ona promosaun,” Lere Anan Timur afirma.

Lere Anan Timur mós argumenta katak, promosaun ofisias na’in 4 F-FDTL nian ba Major Jeneral ne’e governu bele konkorda i bele mós la konkorda, tanba agora ne’e sei hanesan hela proposta.

“Ha’u nia prioridade agora ne’e halo oinsa prepara jerasaun foun, pelu menus iha primeira faze na’in 3, semak atu ba Xefi Estadu Maior, semak ba Vise, no semak ba Xefi Estadu Jeneral, tanba ami idade hahú ba dadauk ona,” Lere Anan Timur esplika.

Antes ne’e Ministru Defeza no Seguransa José Agostinho Sequeira Somotxo mós lori ona proposta ba Prezidenti Repúblika atu haree oinsa atu bele promove ofisiais na’in 4 F-FDTL nian ba Major Jeneral. ías

GMN TV | Grupo Média Nacional