Prezidente komisaun eleitoral sei aprezenta kesar tanba difamasaun

Prezidente hosi Komisaun Nasional Eleisaun (CNE) timoroan nian hatete ona, iha loron-kuarta, katak sei aprezenta kesar iha polísia tanba "komentáriu difamatóriu sira" hasoru nia kredibilidade no CNE nian, ne'ebé karik halo hosi membru sira hosi koligasaun partidáriu.

"Komentáriu sira ne'e hanesan asaun ida ajitasaun nian, tentativa hodi la halo fiar ba ita nia instituisaun. Ohin ha'u sei aprezenta duni kesar ba komando polísia no husu hodi iha lalais investigasaun ida ba kazu", hatete hosi Alcino Baris iha deklarasaun sira ba Lusa.

"Kestaun ne'e hanesan importante tanba ami lakohi lakon kredibilidade iha públiku tanba ami maka jere eleisaun antesipadu", nia subliña.

Timor-Leste iha hela períudu kampaña eleitoral ba eleisaun lejislativu antesipadu ne'ebé marka ba loron 12 Maiu.

Komentáriu sira mosu hafoin Aliansa Mudansa ba Progresu (AMP) kestiona kona-ba saida maka sira hanaran "enkontru sekretu" ne'ebé maka Alcino Baris halo iha loron-tersa ho prezidente interinu hosi Rejiaun Administrativu Espesial hosi Oecusse-Ambeno (RAEOA), Arsénio Bano, ne'ebé hanesan mós membru hosi Komité Sentral hosi Frente Revolucionária do Timor-Leste Independente (Fretilin).

Iha pájina Facebook, AMP deskonfia kona-ba motivasaun hosi enkontru no konsidera ona katak reuniaun ne'e hamosu dúvida ba imparsialidade hosi Alcino Baris nian.

Responsável hosi CNE nega ona katak enkontru ne'e la'ós hanesan segredu no AMP la hatene nia konteúdu tanba mosu iha momentu hanesan tanba kesar ida hosi koligasaun rasik.

Enkontru ne'e halo "iha kafé ida, iha públiku no ho membru oioin CNE nian", nia afirma.

"Responsável lokal ida AMP nia halo ona kesar, ha'u hatete katak sei husu klarifikasaun sira ba prezidente interinu hosi RAEOA no hafoin ne'e ema hosi AMP rasik maka hamosu suspeitu sira kona-ba tansá maka iha enkontru no hatete katak hanesan sekretu", Baris hatete.

"Bainhira hamosu suspeita hanesan ne'e entaun halo difamasaun, doko públiku. Iha ne'e laiha buat ida maka sekretu ka subar", nia subliña.

Alcino Baris to'o iha Oecusse iha loron-segunda akompaña hosi visi-prezidente CNE nian, Duarte Tilman, no hosi nia xefe gabinete hodi halo kontaktu sira ho responsável sira no ekipa rejional sira hosi órgaun eleitoral.

"Ha'u ba Oecusse hodi motiva ami nia pesoal monitorizasaun eleitoral nian (...) ne'ebé maka rekruta no sei apoia iha sentru sira no estasaun sira votu nian", Baris hatete.

"Ha'u aproveita ona okaziaun hodi esplika di'ak oinsá funsiona sentru sira votasaun nian hodi garanti, iha nível eleitoral, kualidade no eleisaun ida ne'ebé kredível liu", nia esplika.

Hafoin enkontru ho funsionáriu sira ho delegadu sira CNE nian, iha dadeer, delegasaun hasoru malu, iha parte loraik, ho reprezenta sira hosi partidu polítiku sira, no partisipa iha enkontru ne'e elementu sira hosi Fretilin ho Partidu Demokrátiku no hosi koligasaun sira AMP nian no Frente Dezenvolvimentu Demokrátiku (FDD).

Baris esplika katak durante enkontru, reprezentante AMP nian "halo kesar balun kona-ba autoridade munisipal" liuliu relasionadu ho programa distribuisaun ida foos nian no subsídiu ida dolar tolu ne'ebé halo durante kampaña.

"Ha'u esplika ona katak sei tenta hasoru malu lalais ho prezidente interinu rejiaun nian hodi klarifika kestaun sira ne'e iha relasaun ka la'e ho partidu Fretilin", nia esplika.

Tanba feriadu iha loron-tersa, enkontru ne'e la marka iha sede administrasaun rejional nian, maibé iha kafé ida, iha sentru Pante Makasar nian, no partisipa hosi delegasaun CNE nian no delegasaun ida hosi rejiaun autónomu, lidera hosi prezidente interinu hosi rejiaun nian, Arsénio Bano. Iha mós elementu sira hosi forsa seguransa sira iha kafé.

"Ami ko'alia ona kestaun sira ne'e no ami tenta klarifika situasaun. Prezidente interinu esplika ona katak laiha ligasaun ho partidu no fahe foos halo ho baze hosi lista hosi ema sira ne'ebé maka presiza no prepara hosi komunidade lokal sira", afirma hosi Baris.

"Programa hosi dolar tolu hanesan inisiativu ida hodi apoia iha reabilitasaun no hamoos asesu sira no zona sira hosi sentru votasaun nian. Maibé nia informa katak iha fatin balun la to'o envolvimentu komunitáriu ne'e no presiza mákina sira", nia esplika.

Observador internasional sira, iha loron hirak ikus ne'e, hatudu preokupasaun balun kona-ba tentativa sira, liuliu hosi parte elementu sira AMP nian, hodi kestiona kredibilidade CNE nian.

Maski koligasaun la aprezenta kesar formal ruma hasoru órgaun eleitoral ruma, AMP uza nafatin Facebook hodi hamosu suspeitu kona-ba instituisaun.

Baris konfirma ona katak, to'o agora, laiha partidu ida ka koligasaun ruma maka aprezenta kesar formal hasoru CNE ka Sekretariadu Tékniku hosi Administrasaun Eleitoral (STAE). Kesar sira ne'ebé aprezenta refere ba "insidente ki'ik sira", nia hatete.

Kazu sira hanesan utilizasaun laloos hosi karreta sira Estadu nian, destruisaun hosi símbolu sira hosi partidu sira seluk, ka kazu sira seluk, refere nafatin ba polísia hodi halo investigasaun.

Kampaña eleitoral ba lejislativu hotu iha loron 09 Maiu.

SAPO TL ho Lusa