Ministru Negósiu Estranjeiru
Uruguai nian admiti ona, iha loron-segunda ne'e, ba Lusa katak sei aprezenta
kandidatura ida ba membru hosi Komunidade Nasaun sira Lian Portugeza (CPLP),
hodi hatete katak maski la ko'alia lian portugés, iha afinidade maka'as ida ho
lian.
Kestionadu iha marjen hosi
enkontru ida ho embaixador permanente sira hosi nasaun luzófonu sira iha CPLP
kona-ba posibilidade estatutu Uruguai nian hodi evolui hosi nasaun observador
ba Estadu membru, Rodolfo Nin Novoa admiti ona katak "la hatene loloos funsionamentu
ka rekizitu sira", maibé nia hatete katak hanesan posibilidade ida.
"Bainhira tama iha
organizasaun ida hanesan nasaun observador, ami iha nafatin objetivu hodi sai
membru permanente; ami la ko'alia portugés, maibé ami iha ligasaun ba lian portugeza",
hatutan hosi xefe diplomasia Uruguai nian ba Lusa.
Iha final hosi vizita ba CPLP,
iha ámbitu hosi vizita ofisial ne'ebé halo ba Portugal, Rodolfo Nin Novoa
justifika ona reuniaun ho embaixador sira tanba "proximidade ho nasaun ida
importante liu hosi nasaun sira lian portugeza nian, Brazil", ne'ebé
permiti Uruguai relasiona "ho di'ak tebes ho nia populasaun sira, nia
kultura, no nia demokrasia".
Uruguai iha estatutu hanesan
Observador Asosiadu dezde Konferénsia ba dala 11 hosi Xefe Estadu no Governu
sira CPLP nian, ne'ebé halo iha tinan 2016 nia rohan iha Brazília.
"Ami iha CPLP tinan ida ho
balun de'it, maibé buat ne'ebé dada ami maka posibilidade hodi kordena polítika
ekonómiku sira, kultural sira, direitu ema nian, demokrasia ho liberdade,
ne'ebé hanesan baze fundamental hosi sustentasaun dame nian no seguransa
internasional sira", konklui hosi governante ne'e.
SAPO TL ho Lusa
Sem comentários:
Enviar um comentário