domingo, 3 de junho de 2018

KHUNTO Rejeita sei Sai Vítima iha PN

PARTILHAR

DILI: Partidu tolu hanesan CNRT, PLP no KHUNTO ne’ebé antes ne’e halo ona pra-koligasaun hasoru eleisaun antesipada ho bandeira Aliansa Mudansa ba Progresu (AMP) tenke ‘fahe-malu’ iha Parlamentu Nasionál hoi da-idak nia bankada.

Nia hatutan, durante ne’e AMP halo pra-koligasaun hodi avansa ba eleisaun, maibé mai iha PN bele fahe bankada ketak-ketak, tanba rejimentu PN iha artigu 11 fó dalan hela mai atu estabelese bankada partidu CNRT, PLP no KHUNTO.

“Ami sei hala’o polítika AMP nian no ami sente solidu liu, laiha problema tanba ne’e husi ami na'in tolu ne’e ida sei la sai vítima”, dehan Sekretáriu Jerál partidu KHUNTO, José Agostinho, iha Sede CNRT, Bairru-Grilos, horisehik.

Nia esplika, opiniaun públiku mosu katak estabelese bankada tolu iha PN sei bele mosu fahe malu no KHUNTO mak sei sai vítima. Tanba ne’e, hakarak hatete de’it buat hirak ne’e sei la akontese partidu tolu ne’e solidu tebes.

Iha fatin hanesan, Xefe Bankada PLP, Fidelis Magalhães hatete, estabelesimentu bankada tolu iha PN ne’e bazeia ba rejimentu, tanba ne’e la iha problema.

“Iha sala plenária ami sei tau bandeira rua, AMP-PLP, AMP-CNRT no AMP-KHUNTO”, dehan nia.

Nia hatutan, polítika AMP nian ne’ebé estabelese bankada tolu iha PN ne’e la'ós atu hamonu malu, maibé hanesan atu responde administrasaun iha parlamentu nian. Tanba ne’e, ba públiku labele halo espekulasaun.

Nia konsidera opiniaun hirak ne’ebé mosu ne’e mai husi ema sira ne’ebé la gosta AMP no hakarak atu destrui relasaun partidu tolu ne’ebé durante ne’e solidu tebes.

Fidelis reforsa, partidu CNRT, PLP no KHUNTO ne’ebé hamutuk ne’e tanba iha ona konsensu. Ne’e duni, garante estabilidade governativa ne’e to’o 2023 no ba oin sei forsa liután.

Jacinto Xavier | Independente
PARTILHAR

Author: verified_user

Publicação luso-timorense sem fins lucrativos

0 comentários: