Loron 12 Juñu Sesaun Dahuluk Lejizlatura Da-Lima

DILI, (TATOLI) – Prezidente Bankada Kongresu Nasionál Rekonstrusaun Timorense (CNRT-Sigla Portugés), Arão Noe, informa;  ohin, iha Parlamentu Nasionál (PN) informa katak iha ona informasaun prelimináriu ba konvokatóriu sesaun dahuluk ba abertura lejizlatura da-lima nian.

“Iha ona informasaun prelimináriu de’it katak tékniku sira kontaktu ona funsionáriu sira bankada nian hateten, prepara ona karta ba 12 Juñu kona-ba konvokatóriu nian, maibé ida ne’e seidauk ofisiál. Prezidente Parlamentu Nasionál, Aniceto Guterres seidauk asina no bankada sira parlamentár mós seidauk simu karta ruma,” Arao Noel informa ba Jornalista sira iha Parlamentu Nasionál, Ohin.

Tuir Arao, sé data mak iha 12 Juñu signifika Prezidente PN kumpre los rejimentu katak hafoin publikasaun rezultadu eleisaun iha Jornál Repúblika, iha loron 15 nia laran tenke halo ona konvokatóriu.

“Ami nia hakarak di’ak liu lais, la’ós tan mandatu foun, maibé interese Estadu nian, ita iha problema finanseiru kona-ba duodecimo katak informasaun hosi Finansa hateten iha ona problema orsamentu iha Jullu,” Arao esplika.

Parte seluk, Prezidente Bankada hosi Partidu Demokrátiku (PD), Maria Teresa, hateten estabelesimentu lejizlatura da-lima ita seidauk hatene los no bainhira, maibé tuir lei dezde tribunál rekursu fó sai rezultadu eleisaun nian, iha loron 15 nia laran koligasaun Aliansa Mudansa ba progresu bele halo preparasaun.

Lei hatete, iha loron 15 atu forma lejizlatura da-lima hafoin Prezidente PN bele deside tempu no to’o agora seidauk iha karta, maibé komisaun permanente mós sei enkontru atu haree ba asuntu ne’e.

Entretantu, iha Meza PN, deputadu hosi bankada ida-idak hetan ona avizu hodi aruma ona sasán hanesan livru no seluk tan atu tékniku sira parlamentu nian bele prepara fatin hodi simu lejizlatura da-lima.

Jornalista: Zezito Silva | Editór : Manuel Pinto

Imajen: Deputadu Parlamentu Nasionál Arão Noe